भांगरभूंय | प्रतिनिधी
पणजी, प्रतिनिधी ः देशभरांतल्या शेतकारांक अर्थीक मजत म्हणून केंद्र सरकारान 2014 वर्सा प्रधानमंत्री किसान सम्मान निधी येवजण सुरू केली. तिचे खाला पात्र शेतकारांक दरेकीं 2 हजार रुपया अशें तीन टप्प्यांनी 6 हजार रुपया दितात. पूण आतां येणावळ कर भरपी आनी राज्यांतली जमीन नांवाचेर नाशिल्ल्या 3700 शेतकारांक हे खेपे किसान सम्मान निधी येवजणेंतल्यान वगळ्ळ्यात. उरिल्ल्या 5,983 शेतकारांक दरेकीं 6 रुपया असो 15 वो हप्तो दिला.
शेतकी संचालक नेव्हील आफोन्सो हांणी हे विशीं म्हायती दिली. फाटल्या कांय वर्सांत केंद्र सरकाराच्या किसान सम्मान निधी येवजणेचो राज्यांतल्या धा हजारां परस चड शेतकारांनी फायदो घेतलो. येणावळ कर भरपी वा तांच्या नांवार जमीन नाशिल्ल्या शेतकारांक हे येवजणेचो फायदो मेळचो ना अशी अट केंद्र सरकारान घाल्ली. देखून राज्यांतल्या कांय शेतकारांनी हे येवजणे खातीर अर्ज करुंक नाशिल्ले. पूण, शेतकी उदरगतीच्या हेतान शेतकी खात्यान तांकां केंद्राचे हे येवजणेचो फायदो दिल्लो. उपरांत कांय म्हयन्यां आदीं शेतकी खात्यानच एक नोटीस जारी करून येणावळ कर भरपी आनी जमनीचो हक्क नाशिल्ल्या शेतकारांक तांणी घेतिल्ली रक्कम सरकाराक परत करपा खातीर अपात्र थारायिल्ले. तेन्ना अपात्र थारिल्ल्या शेतकारांनी बोवाळ केलो आनी खंयचेय परिस्थितींत मेळिल्ली रक्कम सरकाराक परत करचे नात अशें म्हणत मुख्यमंत्री डॉ. प्रमोद सावंत हाणी हांतूत लक्ष घालचे अशी विनवणी केल्ली.
शेतकारांची मागणी लक्षांत घेवन डॉ. सावंत हांणी शेतकारांक मेळिल्ली 4.94 कोटी रक्कम राज्य सरकारा वरवीं केंद्राक दिवपाचें थारायलें आनी ह्या शेतकारांक व्हडली सुटका मेळ्ळी. पूण आतां ह्या 3700 शेतकारांक कायमचे अपात्र थारावन तांका 15 व्या हप्त्याचो फायदो दिवंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
