भांगरभूंय | प्रतिनिधी
रमाकांत खलपः टिका केल्ल्यान श्रीपाद नायक हांकां जाप
भांगरभूंय । प्रतिनिधी
पणजीः भायल्यो व्हडल्यो सहकारी बँको हाडून गोंयच्यो थळाव्यो सहकार बँको तुमी न्हिदयल्यात. त्या बँकांचें पुनरुज्जीवन करपाक सरकारान कसली पावलां उखल्ल्यांत हो प्रस्न श्रीपाद नायक हांणी तांचो सहकारमंत्री सुभाष शिरोडकार हांकां पयलीं विचारचो आनी उपरांतूच आपल्याचेर टिका करची, असो सल्लो काँग्रेसीचे उत्तर गोंय लोकसभा मतदारसंघाचे उमेदवार अॅड. रमाकांत खलप हांणी श्रीपाद नायक हांकां दिलो.
अॅड. खलप हांणी सांताक्रूज मतदारसंघांत आपलो प्रचार केलो. काँग्रेस प्रदेशाध्यक्ष अमीत पाटकार, इंडी आघाडीचे वांगडी अमीत पालेकार आनी हेर फुडारी हाजीर आशिल्ले. थंय तांणी काँग्रेसीच्या समर्थकां वांगडा बसका घेतली. त्या वेळार अॅड. खलप उलयताले. खलपान कोणाचे कितले पयशे दिवपाचे उरल्यात ते तांणी सांगचें, ह्या प्रस्नाचेर अॅड. खलप जाप दिताले.
आतांचे तुमी म्हापसा अर्बन बँकेचे आंकडे काडून पळयात. कोणाक दिवपाक जाय त्या पयशां परस बँकेचें भांडवल चड आसा, अशें अधिकृत आंकडे सांगतात. बुडपी बँको उण्या वेळा भितर पुनरुज्जीवीत करप शक्य आसा. पूण सरकार कितें करता, हो प्रस्न श्रीपाद भाऊन सहकार मंत्र्यांक विचारचो. तुमी दुसऱ्या राज्यांतल्यो व्हड व्हड बँको हाडटात, पूण आमच्या बँकांचें कितें? अशें करून तुमी संजिवनी सहकार साकर कारखानो मारून उडयलो आनी मडगांव अर्बन बँकूय मरपाक सोडली. अश्यो कितल्योश्योच बँको आसात, पूण तुमी तांचें पुनरुज्जीवन करिनात. हें करपा खातीर आमी वांगडा येवन काम करपाची गरज आसा, अशें अॅड. खलप हांणी सांगलें. आपूण जेन्ना कायदोमंत्री आशिल्लो तेन्ना बायलांक 33 टक्के राजकी आरक्षण दिवपाचें विधेयक आपणे 8 सप्टेंबर 1996 ह्या दिसा संसदेंत मांडिल्लें. भाजपान तेन्ना ताका विरोध केल्लो आनी तें विधेयक आडावन दवरिल्लें. आतां 10 वर्सां उपरांत आपली कारकीर्द सोंपचे आदीं तें विधेयक परतून हाडून प्रधानमंत्री नरेंद्र मोदी हाचें स्रय घेता. महिला आरक्षणाचें विधेयक संसदेंत प्रलंबीत आसा, हाचो उगडास काँग्रेसीच्या तामीळनाडू खासदारान मोदी हांकां उगडास करून दिले उपरांतूच तें संसदेंत परतून आयलें, असो दावो खलप हांणी केलो.
उमेदवारी मेळची न्हय, म्हूण आपले आड कारस्थान
फाटलीं 25 वर्सां जाली आपूण वेंचणुकेच्या राजकारणांतल्यान कुशीक रावलों. पूण खूबशे लोक आपल्याक उमेदवारी अर्ज भर म्हूण फाटीक लागले. उमेदवारी खातीर ऑफिसांत खूब जाण रांकेंत आशिल्ले. लोकांची मागणी मान्य करून आपणे अर्ज दिलो. पूण आपल्याक तिकेट मेळची न्हय हे खातीर मुख्यमंत्री डॉ. प्रमोद सावंत हांकां फुलां भेटयतनाचो फोटो दाखोवन खलप भाजपांत उडी मारपाक शकता, अशें सोनिया गांधी हांकां सांगलें. पुराय वातावरण दुशीत करपाचो यत्न जालो. पूण सोनिया गांधी हांणी सांगलें, खलपांक आपूण वैयक्तीक रितीन वळखता. तांणी आपल्याचेर पुराय विस्वास दवरलो. एक लायक खासदार म्हूण काम करून आपूण त्या विस्वासाची फारीकपण करतलों, अशें अॅड. रमाकांत खलप हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
