कोलव्यां सगल्यांत चड भाडेकरु

भांगरभूंय | प्रतिनिधी

भाड्यान रावपी लोकांची नोंदणी करपाचो पुलिसांचो उलो

मडगांव, प्रतिनिधी : गांवांत सुरक्षेचो प्रस्न म्हत्वाचो आशिल्ल्यान भाड्याच्या घरांत रावपी लोकांची नोंदणी करप गरजेचें. राज्य सरकारान भाड्याक रावपी लोकांची पुलीस स्टेशनांत नोंदणी करप सक्तीचें केलां. अंदूंच्या वर्सा प्रमाण दक्षिण गोंयांतल्या वेगवेगळ्या पुलीस स्टेशनांनी 25,645 भाडेकारांची नोंदणी जाल्या.
मेळिल्ले म्हायती प्रमाण, दक्षीण गोंयांतल्या वेगवेगळ्या पुलीस स्टेशनां वयल्यान भाड्यांन रावपी लोकांची नोंदणी जाता. कोलवा पुलीस स्टेशनात 4077, फोंडें 3528, वेर्णा 2979, कुंकळींत 2447, वास्कोंत 2436, मडगांवांत 1869, कुडचडेंत 1739, मायणा कुडतरींत 1660, फातोर्डात 1094, मुरगांवांत 797, सांगे 794, काणकोणांत 775, केपें 770, कुले वाठारांत 403 आनी म्हाड्डोळ वाठारांत 257 भाडेकारांची नोंदणी जाल्या.
राज्यांतल्या जायत्या वाठारांनी घरमालकांनी भाड्याच्या घरांतल्या लोकांची म्हायती पुलीस स्टेशनाक दिवंक नाशिल्ल्याचेंय दिसता. बेताळभाटी, मायणा आनी दवर्ली पंचायतींनी ग्रामसभां कडल्यान थाराव घेतिल्लो आनी भाड्याक घेवप्यांक दरेका वाठाराची तपासणी करून भाड्याच्या घरांतल्या लोकांची नोंदणी करपाची सुचोवणी केल्ली. भाड्याच्या लोकांची नोंदणी करप कायद्यान सक्तीचें आसा तरी लेगीत जायते जाण म्हायती दिवपाक दुर्लक्ष करता. जायत्या सुवातींनी बेकायदेशीर कुडी आसात, तेय म्हायती दिना. ते खातीर दक्षीण गोंय पुलीस आपल्या भाड्याच्या घरांतल्या लोकांची नोंदणी करची अशें आवाहन करतात.
दक्षीण गोंयांतल्या भाड्याच्या पुलीस स्टेशनाचो डेटा पळयल्यार सगळ्यांत चडांत चड भाडेकारांची संख्या कोलवा पुलीस स्टेशन वाठारांत आसा. जाल्यार सगळ्यांत उणें म्हाड्डोळा आसा. वेगवेगळ्यो कंपनीं आनी उद्देगीक वसणुको आशिल्ल्या सुवातींनीय भाड्याक रावपी लोकांचो आंकडो चड आसा. कुंकळ्ळी, वास्को, वेर्णें, कुडचड्यार हजारां परस चड भाडेकार रावतात.