कोलवा दर्यादेग पार्किंगाक विरोध

भांगरभूंय | प्रतिनिधी

मडगांव, प्रतिनिधी: कोलवा दर्यादेग वाठारांत थळाव्यांचे वेवसाय आसात. पे पार्कींग केल्यार शॅक्स, नुस्तेंकारां सयत थळाव्यांकूय पे पार्किंगचो फटको बसतलो. तशेंच पे पार्कींगाक लागून पर्यटकांचोय आंकडो देवपाची शक्यताय आसा. ताका लागून नागरिकांनी पे पार्कींगाक विरोध केलो. कोलवाळे विशेश ग्रामसभेंत हे विशीं थाराव घेतलो. सगळ्यांच्यो सयो घेवपाची मोहीम राबोवपाचे आशिल्ल्यान सरकारान लोकांचें म्हणणें आयकून पे पार्कींगची प्रक्रिया रद्द करची अशी मागणी केली.
कोलवा दर्यादेग लागसारा पे अँड पार्कींग करपाची अधिसुचवणी काडल्या. राज्य सरकारान ३० नोव्हेंबराक कोलवा दर्यादेग वाठारांत पे पार्कींग विशी अधिसुचवणी जारी केल्या. दर्यादेग भागांत पर्यटन खात्याच्या वाठारांत येवपी जाग्यार १५० दोन चाकी, ८४ चार चाकी, ६४ कार आनी १५ टॅक्सीं खातीर पे पार्कींग जागो उपलब्ध करतले. हे खातीर पर्यटन खात्यान ठेकेदाराची नेमणूक करची. तशेंच पर्यटन खात्याच्या जाग्यार सुविधायो उपलब्ध करतले. हे विशींच अधिसुचवणी जारी केल्या. उपरांत आमदार व्हेंझी व्हिएगस हांणी थळाव्यांक, तशेंच थळाव्या टॅक्सींक शुल्क लागू करचे न्हय अशी मागणी केल्ली. उपरांत आदले मंत्री मिकी पाशेको हांणीय थळाव्यांक पे अँड पार्कींगचो त्रास सोंसचो पडिल्ल्यान कोलवा पे पार्किंगाक विरोध केल्लो. उपरांत वॉरन आलेमाव तशेंच हेर थळाव्यांनीय विरोध केल्लो. कोलवेंचे कांय नुस्तेकार आनी थळाव्यांनी मंत्री आलेक्स सिक्वेरा हांची भेट घेतिल्ली. तेन्ना तांणी थळाव्यां खातीर सूट मेळचे खातीर यत्न करतलों अशें आस्वासन दिल्लें.
कोलवा पंचायतनि आयज विशेश ग्रामसभा आयोजीत केल्ली. हे ग्रामसभेक सरपंच सुझी ङ्गर्नांडीस हांचे सयत आमदार व्हेंझी व्हिएगस हाजीर आशिल्ले. ह्या वेळार नागरिकांनी पे पार्कींग केल्यार थळाव्यांचें स्वातंत्र्य नश्ट जातलें. कोवीड म्हामारीच्या काळांत वेवसायिकांक अर्थीक आडखळींक तोंड दिवचें पडलें. आतां बारीक सारीक उत्पन्न मेळटा तेन्ना दर्यादेगेवयल्या पर्यटनाक हाचो फटको बसतलो. तशेंच वेवसायाकूय फटक बसतलो. रांपणकार, थळाव्यांक पे पार्कींग भरचें पडटलें. आशिकुशीकच्या वाठारांतले लोक कोलवा दर्यादेगेर येवचे ना. ते दुसरे दर्यादेगेर वतले. रांपणकार, नुस्तेंकारांकूय हाचो फटको बसतलो अशें सांगलें.