भांगरभूंय | प्रतिनिधी
म्हापशें, प्रतिनिधी : कोलवाळे रस्त्यार येरादारी वयल्यान बाचाबाची जावन स्कूटर चलोवपी चली आनी तिच्या इश्टाक तिगांनी मेळून मार घालो, ह्या आरोपा वयल्यान पुलिसांनी तिगां आड गुन्यांव नोंद केला. कोलवाळचे पंकज सडेकार, पंकज साळगांवकार आनी देवेंद्र तेमकार अशीं त्या तिगांयचीं नांवां जावन आसात. हे तिगून सध्या पळून गेल्यात. तांकां पुलीस सोदतात.
हे विशीं चड म्हायती प्रमाण, शेनवारा सांजेवेळार सुमार ७.१५ वरांचेर श्रीराम मंदिरा लागसारा ही घडणूक घडली. फिर्यादी चली म्हापशेंच्या एका आस्थापनांत कामाक आसता. तिचो इश्ट सरकारी कर्मचारी. तो पणजे कामाक आसता. हीं दोगांय कामा वयल्यान सुटून पिर्णा आपल्या घरा वतालीं.
पुलिसांनी दिल्ले म्हायती प्रमाण, कोलवाळे फार्मसी लागसारा दुबावीत पंकज सडेकार हाणें आपली गाडी त्या दोगांयच्या आंगार घाली. ताका लागून तांचे मदीं वाद जालो. उपरांत ताणें दुचाकीचो फाटलाव करून तांचे स्कूटरी मुखार गाडी आडवी घालून तांकां आडावन वायट उतरां दिलीं. उपरांत हेर दोगूय दुबावीत थंय येवन त्या तिगांयनी तिका आनी तिच्या इश्टाक मार घालो आनी मारून उडोवपाची धमकी दिली. उपरांत दुबावीत तिगून घडणुके सुवातेरच्या पळ्ळे.
ते चली आनी तिच्या इश्टाचेर म्हापशें जिल्हो हॉस्पिटलांत उपचार केले. ह्या प्रकरणांत पुलिसांनी गुन्यांव नोंद केला. फुडलो तपास पुलीस निरीक्षक विजय राणे हांच्या मार्गदर्शना खाला उपनिरीक्षक कुणाल नायक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
