भांगरभूंय | प्रतिनिधी
हरमल पंचायतीची मागणी
हरमल, बातमीदार : हरमल पंचायत वाठारांतल्या कोयराची समस्या खर आसा आनी ती योग्य रितीन सोडोवप गरजेचें. ताका लागून वेवसायिकांनी कोयर एकठांय करप्यांक सहकार्य करचें आनी गांवचे नितळसाणे खातीर योगदान दिवचें अशें कोयर वेवस्थापन समितीचे बसकेंत थारलें.
हरमल पंचायत कार्यालयांत जाल्ले बसकेचें अध्यक्षपद समितीचे अध्यक्ष समीर कुडव हांणी सांबाळ्ळें. सध्या कोयर एकठांय करपाचें काम सारकें चलता, केन्ना- केन्ना रिक्शेंतलो कोयर रितो जाय मेरेन ती हेर कडेन वचूंक शकना. वेवसायीकांनी ते खातीर सहकार्य करचें. रिक्शा उसरां आयल्यार कांय वेवसायीक पंचायतीच्या कोयर कामगारांचेर हात उखलतात. अशी गुंडगिरी ह्यान फुडें खपोवन घेवचे नात. नेमां प्रमाण पुलिशेंत कागाळ करपाचो अधिकार त्या कर्मचार्यांक आसा, अशें कुडव हांणी सांगलें
फाटल्या सप्तका सावन कोयराचें प्रमाण खूब वाडलां आनी ताचेर निरिक्षण करपाक समितीचो निरिक्षक वांगडा वतलो अशें थारलां. कांय वेवसायिकांनी गोंय प्रदूशण नियंत्रण मंडळाक स्वताच्या आस्थापनांतल्यान धा किलो कोयर दितात, अशें मंडळाक बरोवन दिलां.
गांव कोयर मुक्त करपा खातीर पंचायतीन शुल्क घेवचें. सविस्तर म्हायती आनी वळेरी तयार करची, आनी वेवसायिकाक शुल्क भरपाचे नेम आनी अटी विशीं पुराय म्हायती दिवची अशें सुचयलें. हे बसकेंत कांय पंच हाजीर रावूंक नाशिल्ल्यान तिडक उक्तायली. पंचायत सचीव सचिन धावस्कर हांणी हे बसकेक मार्गदर्शन केलें आनी फुडल्या म्हयन्यांत कंत्राटदारांची नेमणूक जातली अशें सांगलें.
हे बसकेंत उपसरपंच दिव्या गडेकार, पंच अनुपमा मयेंकार, सोनाली माज्जी, समितीचे वांगडी रुपेश नायक, महेश वायंगणकार, सद्गुरू नायक हाजीर आशिल्ले. सचीव चंद्रहास दाभोलकार हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
