भांगरभूंय | प्रतिनिधी
फातोड्डें पुलिशेंत सात दुबावितां आड खुनाचो यत्न केल्ल्याचो गुन्यांव
मडगांव: मठग्रामस्थ हिंदू सभेच्या पाजीफोंड मसंडभुंयेंत कोयर उडयत आशिल्ल्यांक विचारिल्ले खातीर तिडकीन दवर्ली दिकरपालचे पंच वांगडी साईश राजाध्यक्ष आनी जयंत फोंडेंकार हांकां मारपेटीचो प्रकार घडलो. तशेंच मारपेट करप्यांनी हिंदू धर्मा विशीं आक्षेपार्ह विधान केलें आनी वाद वाडलो. फातोड्डें पुलिसांनी कागाळी प्रमाण खुनाचो यत्न केल्ल्या प्रकरणांत सात दुबावितां आड गुन्यांव नोंद केला.
मडगांव हिंदू मसंडभुंयेंत सांजवेळा 4 वरांच्या सुमाराक दोग जाण कोयर उडोवपा खातीर आयिल्ले तेन्ना थंयच्यान वचपी दवर्ली दिकरपालचे पंच वांगडी साईश राजाध्यक्ष हांणी तांकां विचारलें. हेच तिडकींतल्यान तांणी आनीक कांय जाणांक आपोवन राजाध्यक्ष हांचे सयत जयंत फोंडेंकार ह्या दोगांक मारपेट केली. तशेंच मारपेट करप्यांनी हिंदू धर्मियांच्यो भावना दुखोवपी उलोवपांय केल्ल्यान हो वाद वाडलो.
कागाळदार साईश राजाध्यक्ष हांणी सांगलें, सांजवेळा 4 वरांच्या सुमाराक जेवणा खातीर घरा वतना दोग जाण दुचाकी वेल्यान कोयर हिंदू मसंडभुंयेंत उडयतना दिसले. तांकां विचारलें तेन्ना ते पळून वचपाचे तयारेंत आसतना दुचाकीची चावी काडून घेतली आनी मठग्रामस्थ सभेचे जयंत फोंडेंकार हांकां आपयलें.
मजगतीं, दुबावितांनी आनीक कांय जाणांक आपोवन घेतले. फोंडेंकार आयले उपरांत त्या तरणाट्यांक विचारतकच धा ते बारा तरणाटे घडणूक थळार आयले. तांच्या हातांत चॉपर, लोखंडाचो दांडो आदीं शस्त्रां आशिल्लीं. तांणी मारपेट करपाक सुरवात केली. गळ्यांतली भांगराची सरपळी काडली, पयशे चोरले. तशेंच हिंदुच्यो भावना दुखावतल्यो अशें विधान केलें. हाची कागाळ करपा खातीर मडगांव पुलीस स्टेशनार वतकच मसंडभूंय फातोड्डें परिक्षेत्रांत येत आशिल्ल्याचें समजलें. फातोड्डें पुलीस स्टेशनार आयले उपरांत मारपेट करपी पयलींच कागाळ दिवपा खातीर आयिल्ल्याचें दिसून आयलें. फातोड्डें पुलिसांनी जाल्ली घडणूक सांगत कागाळ नोंद केल्ल्याचें साईश हांणी सांगलें. तशेंच मुख्यमंत्र्या सयत भाजपाच्या दोनूय खासदारांकूय कॉल करून अन्याय जावंक दिवचे नात अशें आस्वासन दिल्ल्याचें साईश हांणी सांगलें.
मठग्रामस्थ हिंदू सभेचे अध्यक्ष भाई नायक हांणी सांगलें, हिंदू मसंडभूंय हें पवित्र स्थान मानतात. थंय कोयर उडोवपाचे प्रकार घडटात. कोयर उडोवपा खातीर आयिल्ल्या मनशाक पंच साईश राजाध्यक्ष हांणी मसंडभुंयेंत कोयर उडोवपा वेल्यान विचारलें, तांणी मारपेटीची भाशा उलयली. उपरांत साईश हांणी आनीक एक वांगडी जयंत फोंडेंकार हांकां आपोवन घेतले. त्या वेळार धा ते 12 जाणांच्या गटान तांचेर हल्लो करून जमनीर लोळोवन मारपेट केली. तशेंच हिंदू विशीं आक्षेपार्ह विधान केलें. मारपेट करप्यांचेर खर कारवायेची गरज आशिल्ल्याचें तांणी म्हणलें.
फातोड्डें पुलिसांनी मारपेटीची कागाळ नोंद करून घेतल्या. उपरांत सात दुबावितां आड खुनाचो यत्न केल्ल्या प्रकरणांत गुन्यांव नोंद केला. दुबावीत अफझल शेख, जाफर खान, मंजुनाथ हरिजन, शाबुद्दीन करकट, नासीर शेख, निझाम बासू, जाफर बासू हांचेर गुन्यांव नोंद केला. ह्या प्रकरणांत फातोड्डेंचे पुलीस निरिक्षक दितेंद्र नायक हांच्या मार्गदर्शना खाला फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
