भांगरभूंय | प्रतिनिधी
दिवचल: गोंयचें पर्यटन क्षेत्र आतां दर्यादेगे सावन गांवांगांवांनी पाविल्ल्यान जमनीचीं मोलां वाडल्यांत. ताका लागून कोमुनिदाद सारक्या संस्थांनी जमनीचे घोटाळे व्हड प्रमाणांत जावंक लागल्यात. हे सगले प्रकार राजकारण्यांक हाता कडेन धरून चड जातात. पुर्तुगेझांचे राजवटींत कोमुनिदाद सारक्यो संस्था तिगोवन दवरिल्ल्यो अशें आमदार विजय सरदेसाय हांणी सांगलें. ताका लागून जमीन बळाकावपाचे प्रकार वाडत जाल्यार गांव दिल्लीकाराच्या हातांत वचपाक वेळ लागचो ना अशेंय तांणी म्हणलें.
ह्या वेळार माचयेर अडवलपाचे सरपंच गजानन पालकार, उपसरपंच विनश्री गांवकार, देवस्थानाचे अध्यक्ष संतोष गांवकार, नेताजी पालकार, अर्जून गांवकार, सांतान डिसोझा, सुबत्ता सामंत, शेखर परवार, गितेश गडेकर, श्यामसुंदर गांवकार, गोवा फॉरवर्डचे संतोष सावंत, तसेच गोवा फॉरवर्ड पक्षाचे उत्तर गोंय जिल्हो अध्यक्ष दीपक कळंगूटकार हाजीर आशिल्ले.
ह्या वेळार कोमुनिदादचे आदले अध्यक्ष नेताजी गांवकार आनी सांतान डिसोझा हांणी कोमुनिदादीच्या आदल्या पदाधिकाऱ्यांनी जमनी हडप केल्ल्याचो आरोप केलो. फक्त दिवचल म्हालांतूच न्हय जाल्यार पुराय गोंयांत अशे तरेचीं प्रकरणांत मुखार येत आसात आनी ते खातीर लोकजागृताय करप गरजेची आशिल्ल्याचें दीपक कळंगूटकार हांणी सांगलें.
ह्या वेळार विधानसभेंत उत्कृश्ट कामगिरी केल्ले खातीर विजय सरदेसाय हांचो गांवकऱ्या वतीन भोवमान केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
