भांगरभूंय | प्रतिनिधी
मडगांव, प्रतिनिधी : कुडटरेच्या कोयराची समस्या सोडोवपा खातीर पंचायती वावुरता. म्हयन्याक दोन फावट सुको कोयर एकठांय करताले तें आतां सप्तकांतल्यान दोन फावटीं करतले. ओल्या कोयराचेर प्रक्रिया केल्या उपरांत फुडली कारवाय करतले. घाणयार्या उदकाच्या उपचारा खातीर नव्या तंत्रगिन्यानाचो वापर जातलो. कोयर प्रस्न गंभीर आशिल्ल्यान ताचेर पंचायत जाय ते गरजेचे उपाय करतात अशी म्हायती आमदार आलेक्स रेजिनाल्ड हांणी मडगांवां दिली.
ह्या वेळार कुडतरी सरपंच अल्सिनो डिसिल्वा आनी हेर पंच हाजीर आशिल्ले.
कुडटरेच्या पंचायत वाठारांत आशिकुशीकचो कोयर हाडून उडयतात. रामनगरी, सोनसडो वाठारांनी हाडून कोयर उडोवपांत वाड जाल्या. कोयर उडयतना आतां मेरेन तिगांक धरल्यात. तशेंच तो कोयर थंयच्यान उखलपाक लावन तांचेर कारवायूय केल्या. कोयर उडोवप्यांचेर कारवाय जावपाक जाय. ताचे बगर तांकां चूक कळची ना. कोयर एकठांय करपाची जापसालदारकी पंचायतीची. सध्या म्हयन्यांतल्यान दोन फावटीं सुको कोयर एकठांय करतात तो सप्तकांतल्यान दोन फावटीं करतले. ओल्या कोयराचो प्रस्न कायम आसा. ताचेरूय बेगीनूच उपाय काडटले. गांवांत कोयराचो चड प्रस्न येना. पूण इमारतींचे सुवातेर कोयराचो प्रस्न गंभीर जायत चल्ला. तशेंच कुडतरच्या कांय वाठारांनी घाणयार्या उदकाचो प्रस्न आसा. घाणयार्या उदकाक पायपांची जोडणी दिवपाचो विचार आशिल्लो. पूण, पंपींग स्टेशना बगर तें शक्य जावचें ना. ताका लागून नव्या तंत्रज्ञानाचो वापर करून उदक शुध्दीकरण प्रकल्प उबारपाचो विचार आसा. ताचेर फाटल्या देड वर्सा सावन फाटपुरवण करता. ते प्रमाण घाणयार्या उदकाचो वापरत परत कसो जावं येतलो हे विशीं यत्न करतले. कुडतरी मतदारसंघांत जांणी मतां दिवंक ना तांणीय सुविधायो दिवपाचें काम केलां. एमआरएफ प्रकल्पा खातीर पंचायतीन जाग्याची पळोवणी केल्या. बेगीनूच एमआरएङ्ग शेड उबारतले, अशें रेजिनाल्ड हांणी स्पश्ट केलें.
कोमुनिदादच्या जाग्यार बिगर गोंयकारांचें बांदकाम ना
कुडटरी मतदारसंघांतल्या कोमुनिदादच्या जाग्यार एकाय बिगर गोंयकाराचें बांदकाम ना. खासगी जागो वा विक्री केल्ल्या जाग्यार बिगर गोंयकारांनी बांधकामां उबारल्यांत, अशें रेजिनाल्ड म्हणलें.
कुडटरी वेटलँड जाग्यां संबंदी खुबअश्यो आडखळी निर्माण जाल्यात. हरीत लवादांत हे विशीं याचिकाय दाखल जाल्या. प्रत्यक्ष जाग्यार कितें चालू आसा आनी लोकांक कितें जाय ते प्रमाण निर्णय घेतले. दरेक प्रस्न सोडयतले. लोकांच्या सुचवण्यांचेर विचार करून निर्णय घेतले. गरज पडल्यार हे विशीं विधानसभेंतूय प्रस्न विचारतलों अशेंय आमदार रेजिनाल्ड हांणी फुडें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
