किर्तनकार नारायणबुवा बर्वे अंतरले

भांगरभूंय | प्रतिनिधी

वाळपय । प्रतिनिधी ः नामनेचे किर्तनकार, हरिभक्त परायण संघटनेचे संस्थापक आनी सल्लागार नारायण बुवा बर्वे (77) आयज सकाळीं संवसाराक अंतरले. बांबर- सत्तरी हांगां तांणी निमाणो स्वास घेतलो. गोंयांत कीर्तन परंपरेची थापणूक आनी विस्तार करपाक तांणी म्हत्वाचें योगदान दिलां. ‘हरिभक्त परायण’ हे संस्थेचे संस्थापक वांगडी म्हूण तांणी काम केलां.
तांणी गोंयांत कीर्तनाचे हजारांनी प्रयोग केले. गोंय आनी शेजारच्या राज्यांनी मेळून 4150 वयर किर्तनां केल्यांत. कीर्तना वरवीं समाजीक जागृताय आनी समाजाची उदरगत घडोवन हाडपाचे नदरेन नारायणबुवान व्हड कार्य केलां. नारायणबुवा हे भुरगेपणा सावन किर्तनाच्या सांगातान आशिल्ले. किर्तना वरवीं तांणी स्वताचें एक वेगळें नांव केलें. तांणी गोंयांत चक्री किर्तनाचो नवो प्रयोग येसस्वी करुन दाखयलो. उपरांत तांणी चक्रीकीर्तनाचो प्रयोग गोंयच्या जायत्या देवळांनी येसस्वीपणान चालीक लायल्लो. तांचे हाता खाला गोंयांत जायते कीर्तनकार तयार जाले. गोंयांत तशेंच सिंधुदुर्ग प्रांतांत तांणी आपले कले वरवीं खाशेली नामना जोडिल्ली.