भांगरभूंय | प्रतिनिधी
कोरगांव, बातमीदार: कासारवर्णेची नवी सरपंच अवनी अनिल गाड हांचे अध्यक्षते खाला जाल्ले पयलेच ग्रामसभेंत लोकांच्या प्रस्नांचेर समाधानी जापो मेळूंक नाशिल्ल्यान झगडीं जाली. निमाणी ग्रामसभा विसर्जीत करपाची घोशणा केली तेन्ना ग्रामस्थांनी दार बंद करून पंचायत मंडळाक भितर दवरपाचो यत्न केलो. थंय पयलींच हाजीर आशिल्ल्या पुलिसांनी हस्तक्षेप करून वातावरण शांत केलें.
कासारवर्णे पंचायतीची स्थापना जाल्या उपरांत अशी ही पयलीच घडणूक अशें लोकांनी सांगलें. उपसरपंच साक्षी नायक हांचे अध्यक्षते खाला २९ ऑक्टोबराक जाल्ली ग्रामसभा बंद केल्ली. हीच ग्रामसभा काल, १९ नोव्हेंबराक घेतले, अशे घोशणा केल्ली. मजगतीं रिते सुवातेर नवी सरपंच अवनी गाड हांची विरोधा विणें नेमणूक केल्ली. गाड हांचे अध्यक्षते खाला ही पयली ग्रामसभा आयोजीत केल्ली. पूण हाजीर आशिल्ल्या नागरिकांक समाधान जाय सारक्यो जापो मेळूंक नाशिल्ल्यान परत ग्रामसभा बंद उडयली.
ग्रामसभेचे सुरवातेक कांय प्रस्न हाजीर केले. जागो उणो आशिल्ल्यान खुबश्या जाणांक भायर रावचें पडलें. ग्रामसभा व्हडल्या जाग्यार घेवपाक पंचायतीन हॉलाची वेवस्था कित्याक करूंक ना? असो म्हत्वाचो प्रस्न हाजीर केलो. हाचेर समाधानी जाप मेळूंक नाशिल्ल्यान सरपंच आनी नागरिकां मदीं झगडें पेटलें.
‘‘आपूण सरपंच जाल्या उपरांतूच हाची तुमकां याद जाली?’’ असो प्रस्न सरपंच अवनी गाड हांणी केल्या उपरांत वातावरण बरेंच तापलें. उपरांत ग्रामस्थां वतीन उदय महाले हांणी फाटले बसकेच्या प्रस्नांचेर बोट दाखोवन तो लेखी स्वरूपांत पंचायती कडेन सादर केलो. कासारवर्णे पंचायत वाठारांतल्या मनोहर आंतरराष्ट्रीय मोपा विमानतळाचेर काम करप्यांचेर अन्याय जाला. हाचेर पंचायतीन कितें उपाय काडला? हे बसकेक आमदार प्रवीण आर्लेकार आनी मनोहर आंतरराष्ट्रीय मोपा विमानतळ प्रकल्प अधिकारी हाजीर रावतले अशें उतर फाटले बसकेंत दिल्लें. ताचें कितें जालें? असो प्रस्न उदय महाले हांणी सरपंचाक केलो.
हाचेर आमदार प्रवीण आर्लेकार गोंयां भायर आसा. ताका लागून येवंक ना अशें सरपंच अवनी गाड हांणी सांगलें. तांचे हे जापेन लोक समाधानी जावंक ना.
कासारवर्णे पंचायत मंडळ लोकां खातीर न्हय तर आमदार प्रवीण आर्लेकार हांच्या तालार नाचपी मंडळ जावन आसा असो आरोप ह्या वेळार केलो. तशेंच सरपंच अवनी गाड लोकांच्या प्रस्नांक जाप दिवपाक अपेशी थारली.
आदले सरपंच आत्माराम केणी हांणी बेकायदेशीर बांधकामा बाबतीचो प्रस्न हाजीर करून कासारवर्णे ग्राम पंचायत मंडळांतले एक पंचायत वांगडी पयशे मागता असो प्रस्न हाजीर केलो. ताचेर आरोप प्रत्यारोप जाले. हे विशीं पुरावो सादर करपाची मागणी सरपंचान केली. तेन्ना हे विशीं आपल्या कडेन रेकाॅर्डींग आसा अशें सांगल्या उपरांत ग्रामसभेंत व्हड बोवाळ जालो. बोवाळ जाल्लो पळोवन भायर आशिल्ले पुलीस भितर आयल्या उपरांत केस्तांवांक आनीक नेट आयलो. उपरांत ग्रामसभा बंद उडयली.
केणी हांणी पंचायत कार्यालयाचें दार बंद करून पंचायत मंडळाक भितर दवरपाचो यत्न केलो. पुलिसांनी हस्तक्षेप करून वातावरण शांत करपाचो यत्न केलो. उपरांत सरपंच सरळ भायर गेली आनी कांय वेळान परत कार्यालयांत आयली तेन्ना ग्रामस्थ घरा गेल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
