भांगरभूंय | प्रतिनिधी
– नगर नियोजन खात्याक प्रतिज्ञापत्र सादर करून बाजू मांडपाचे निर्देश
पणजी: गोंय जमीन उदरगत इमारत बांदकाम नेमा प्रमाण प्रकल्पाक 6 मिटर रस्तो गरजेचो. पंचायतीन कारणां दाखयात नोटीस धाडल्या. काम बंद दवरपाचो आदेश जारी करूनूय कामुर्ली-बार्देशांत प्रकल्पाचें बांदकाम सुरू आसा, अशें निरिक्षण नोंदोवन उच्च न्यायालयान काम बंद करपाचो अंतरीम आदेश जारी केला. ह्या वेळार नगर नियोजन खात्याक प्रतिज्ञापत्र सादर करून बाजू मांडपाक सांगलें. हे विशींचो आदेश न्या. महेश सोनक आनी न्या. वाल्मिकी मिनेझीस ह्या दोन वागड्यांच्या न्यायपिठान दिला.
ह्या प्रकरणाची फुडली सुनावणी 6 मे 2024 दिसा जातली. ह्या प्रकरणातं नुबर्ट फर्नांडीस हांणी उच्च न्यायालयांत जनहीत याचिका दाखल केल्या. तातूंत तांणी राज्य सरकार, वरिश्ठ नगर नियोजक, कामुर्ली पंचायत, गट विकास अधिकारी (बीडीओ) हांचे सयत इस्प्राव्हा लक्झरी रिअॅलिटी टू एलएलपी आनी इस्प्राव्हा व्हेस्टा प्रायव्हेट लिमिटेड हांकां प्रतिवादी केल्या. ते प्रमाण, कामुर्ली सर्व्हे क्र. 172/1 (बी) तली 15,455 चौ.मिटर जमनींत मेगा प्रकल्प उबारतात. ते खातीर नगर नियोजन खात्यान 14 फेब्रुवारी 2023 दिसा 18 व्हिला उबारपाक परवानगी दिली. ते उपरांत पंचायतीन 13 मार्च 2023 दिसा प्रकल्पाक बांदकाम परवानो जारी केलो.
मजगतीं, याचिकादारान 23 जून 2023 ते 30 जून 2023 मेरेन पंचायती कडेन कागाळ दाखल करून गोंय जमीन उदरगत इमारत बांदकाम नेमा प्रमाण प्रकल्पाक 6 मिटर रस्तो गरजेचो अाशिल्ल्याचो दावो केलो. तशेंच नगरनियोजन खात्या कडेन चुकीची म्हायती दिवन प्रकल्पाक परवानगी घेतिल्ल्याचो दावो केलो.
बीडीओन संबंदीत रस्त्याची पळोवणी करून गरजेचो 6 मिटर रस्तो नाशिल्ल्याचो अहवाल दिलो. उपरांत नगर नियोजन खात्यान 11 जानेवारी 2024 दिसा संबंदींत रस्तो 6 मिटर आशिल्ल्याचो दावो केलो. कंपनीन प्रकल्पाचें काम नेटान सुरू दवरलां. ह्या प्रकरणांत न्यायालयांत जनहीत याचिका दाखल करून याचिकादारान वयले मुद्दे उपस्थीत केले. न्यायालयान याचिकेंत तथ्य आशिल्ल्याचे निरिक्षण नोंदोवन काम बंद दवरपाचो अंतरीम आदेश जारी केलो. तशेंच नगरनियोजन खात्याक प्रतिज्ञापत्र सादर करून बाजू मांडपाक सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
