भांगरभूंय | प्रतिनिधी
2026 आयपीएल जावन लेगीत आयपीएल जावंक नाशिल्ले भशेन दिसलें. कारण एकूच – म्हजे भशेन कितलेशेच ताचे इश्ट, कितलेशेच ताचे चाहते ताका खेळटना पळोवपाक रावतात. पूण ह्या वर्सा अशें कितें घडलें की आयपीएल सुरू जावन काबार जाली तरीy केन्नाच आपलो कॅप्टन कूल सगळ्यांचो लाडको माही आपल्या चाहत्यांक मैदानांत खेळटना दिसलो ना. देखून माहीच्या असंख्य चाहत्यांची हिरमोड जाली. जे चाहते खास करून धोनीची एक झलक पळोवपाक मैदानांत व्हडा उत्साहान येताले, तांकां तांचो माही केन्नाच मैदानांत खेळपाक देंविल्लो दिसलोच ना.
म्हाका अशें दिसता की महेंद्र सिंह धोनी – आयपीएलाचो राजाच जावन आसा. आमी जाणा की महेंद्र सिंह धोनीन 2008 ते 2025 मेरेनच्या आयपीएल कारकिर्दींत चेन्नय सुपर किंग्साक 5 फावट (2010, 2011, 2018, 2021 आनी 2023) चॅम्पियन केलां. ह्या काळांत तो सगळ्यांत चड 10 फावट CSK क फायनलीक घेवन गेलो.पयल्याच सीझनांत ताणें CSK टीमीक फायनली मेरेन पावयली.ताच्या कप्तानी खाला CSK न 2010 आनी 2011 वर्सा सतत दोन फावट आयपीएल ट्रॉफी जिखून इतिहास रचलो.2016 आनी 2017 ह्या दोन वर्सांच्या ‘बॅना’ उपरांत परतून येवन 2018 वर्सा धोनीन आपल्या पंगडाक तिसरो किताब जिखोवन दिलो.चवथो आनी पांचवो किताब (2021 आनी 2023) 2021 वर्सा युएईंत जाल्ल्या फायनलींत केकेआरा’क हारोवन चवथो आनी 2023 वर्सा गुजरात टायटन्साक रोमांचक फायनलींत हारोवन पांचवो किताब आपल्या नांवार केलो.
2024 सीझन सुरू जावचे पयलींच ताणें रुतुराज गायकवाडाक कप्तानी सोंपयली आनी एक विकेटकीपर-बॅट्समन म्हणून 2024 आनी 2025 वर्सा टीमीक आपलें योगदान चालू दवरलें. फाटल्या दोन-तीन आयपीएलांत धोनी निमाणच्या कांय ओव्हरींनी खेळपाक देंवतना दिसता. जरी तो निमाणे एक-दोन बॉल खेळपाक जरी मैदानांत देंवलो तरी चाहते ताका तितल्याच मोगान माथ्यार घेतना दिश्टी पडटात. कारण धोनीची बॅटिंग पळोवपाक, धोनीचो खेळ पळोवपाक दर एक प्रेक्षक आतुरतायेन रावता. ताचो तो हॅलिकॉप्टर शॉट तर प्रेक्षकांच्या काळजांत आसा. हॅलिकॉप्टर शॉटची तर प्रेक्षकांक संवंयच लागल्या. धोनीचो फॅन फालोविंग इतलो खर आसा की ताची बॅटींग पळोवपाक प्रेक्षकांची अफाट गर्दी जमता.
जेन्ना सावन महेंद्र सिंह धोनीन क्रिकेट खेळपाक सुरू केल्या, तेन्ना सावन घडये असो दीस केन्नाच गेलो नासतलो ज्या दिसा माही मैदानार खेळटा आनी हांवें माहीची मॅच पळयली ना. ह्या संवसारांत म्हज्या भशेन लाखांनी-कोट्यांनी धोनीचे चाहते आसतले. धोनीची एक झलक पळोवपाक तरसपी लोकांची उणीव ना. पुराय स्टेडियम माही-माहीच्या नांवान गर्जून उठ्ठा. आयजूय ताच्या हॅलिकॉप्टर शॉटाचो दरएकलो पिसो आसा. हें 2026 चें आयपीएल सुरू जालें आनी आतां सोंपपाक पावलां पूण ताचे इश्ट माहीची वाट पळयत रावले. पूण वाट पळयता-पळयता तांचे 14 मॅचीचो खेळ सोंपलो तरी एक दीस लेगीत माही खेळपाक देंवलो ना. ताच्या असंख्ख चाहत्यांक दुख्ख जालें. अशें दिसता की ह्या वर्सा आयपीएल जावन लेगीत जालीच ना.
एम.एस.धोनी हाका माही टोपण नांवान चड नामना मेळ्ळ्या. हेर लोकप्रिय टोपणनांवां मदीं कॅप्टन कूल (ताच्या शांत वागणुकेचो उल्लेख करून) आनी थाला (तामिळ भाशेंत ताचो अर्थ “फुडारी” असो जाता, ही पदवी ताका चेन्नई सुपर किंग्साच्या फॅन्सांनी दिल्या. 7 जुलय 1981 दिसा झारखंडांतल्या रांची शारांत जल्मल्लो धोनी क्रिकेट कारकिर्द सुरू करचे पयलीं भारतीय रेल्वे खातीर तिकेट कलेक्टर (टीटीई) म्हणून काम करतालो. डिसेंबर २००४ त ताणें बांगलादेशा आड आंतरराश्ट्रीय वनडे पदार्पण केलें. एक वर्सा उपरांत डिसेंबर २००५ त ताणें श्रीलंके आड कसोटी खेळांत पदार्पण केलें.
महेंद्र सिंग धोनीची आंतरराष्ट्रीय क्रिकेट कारकीर्द 2004 ते 2019 मेरेन आशिल्ली. ताच्या कर्णधारपणांत भारतान 2007 वर्सा टी-20 विश्वचषक, 2011 वर्साची वनडे विश्वचषक आनी 2013 वर्सा चॅम्पियन्स ट्रॉफी जिखली. संवसारांतले एक येसस्वी फिनिशर आनी बेस्ट विकेटकीपर म्हणून मानपी धोनीन 538 आंतरराष्ट्रीय मॅचींनी 17,266 धांवड्यो केल्यो.
भारतीय क्रिकेटींत ताणें केल्ल्या योगदानाची दखल घेवन बीसीसीआयन धोनीची 7 क्रमांकाची जर्सी कायमची निवृत्त केल्या. हाचो अर्थ खंयच्याच भारतीय आंतरराष्ट्रीय खेळगड्याक आपल्या जर्सीचेर 7 नंबर घालपाक मेळचो ना.
सचिन तेंडुलकराची 10 क्रमांकाची जर्सी निवृत्त जाले उपरांत एमएस धोनी हो भोवमान मेळोवपी दुसरो भारतीय क्रिकेट खेळगडो जालो. फुडाराक 7 व्या क्रमांकाची जर्सी केन्नाच घालचे नात अशें बीसीसीआयन सगळ्या राष्ट्रीय पंगडाच्या खेळगड्यांक स्पश्ट केलां. तशेंच भारतीय सैन्याच्या प्रादेशिक सैन्यांत महेंद्रसिंग धोनी हाका लॅफ्टनंट कर्नल ही मानाची पदवी आसा. क्रिकेटींतल्या ताच्या कामगिरीची आनी सैन्या कडेन आशिल्ल्या मोगाची वळख करून ताका 2011 वर्सा हो खाशेलो भोवमान मेळ्ळो.
माहीचे मोग करपी लोकांत उणीव ना. आयजूय लोकांच्या ओंठार माही म्हळ्यार आयपीएल, आयपीएल म्हळ्यार माही अशीं उतरां घोळटात. अशा म्हज्या आवडट्या खेळगड्यांक मानाचो मुजरो. अशा थोर खेळगड्यान आनीकूय कांय वर्सां आयपीयल खेळचे अशेंच दिसता.
सत्यवान जांगळी
9923697659
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
