भांगरभूंय | प्रतिनिधी
तुळशीदास नायकः दोनूय सुवातांचेर भाजप जिखपाचो दावो
मडगांवः दक्षीण गोंयांत हे खेपे 60 हजारांच्या मतांच्या फरकान जिखपाचें ध्येय दवरलां. दुसरे वटेन काँग्रेसीचो उमेदवार अजून थारना. त्या पक्षांतली मरगळ पयस जायना. हे मरगळीक तांचे मतदारूय बेजारल्यात. काँग्रेसीचो उमेदवार जिखले उपरांत परतून भाजपांत वतलो, अशी जनभावना आसा. ताका लागून दोनूय सुवातो भाजप जिखतलो हें निश्चीत, अशें दक्षीण गोंय जिल्हो भाजपा अध्यक्ष तुळशीदास नायक हांणी सांगलें.
मडगांवच्या दक्षीण गोंय जिल्हो भाजप कार्यालयांत पत्रकार परिशदेंत नायक उलयताले. ह्या वेळार तांचे वांगडा जिल्हो पंचायत वांगडी परेश नायक, विशाल देसाय, म्हणयारे प्रभाकर गांवकार हाजीर आशिल्ले.
नायक हांणी सांगलें, दक्षीण गोंय भाजप उमेदवार पल्लवी धेंपे हांच्या प्रचाराक व्हड प्रतिसाद मेळटा. 2047 मेरेन देशाक विकसीत करचे खातीर प्रधानमंत्री नरेंद्र मोदी यत्न करतात. गरीब, युवा, महिला आनी शेतकार वर्गाक सक्षम करचे खातीर विवीध येवजण्यो चालीक लायल्यात. पल्लवी धेंपे हांणी आतां मेरेन 14 मतदारसंघांत भेटी दिल्यात. ह्या प्रचाराचो पयलो पांवडो 5 एप्रीलाक पुराय जातलो. तातूंत कार्यकर्त्यांची वळख आनी तेंको घेतले. भाजप कडेन सध्या 28 आमदार आसात. हेर आमदारांचो लेगीत आदार मेळटा, अशें तांणी सांगलें.
प्रधानमंत्री नरेंद्र मोदी हांच्या फुडारपणा खालच्या डबल इंजीन सरकाराचे उदरगतीक लागून तशेंच गोंयांत मुख्यमंत्री डॉ. प्रमोद सावंत हांणी केल्ल्या कामांक लागून दक्षीण गोंयांतल्या लोकां मदीं परिवर्तन जाता, अशें दिसता. भाजपाच्या उमेदवाराक कोणाचोच विरोध दिसना. धेंपे कुटुंबियांच्या कामांक लागून पल्लवी धेंपे हांकां लोकांचें समर्थन मेळटा. उमेदवारा सयत फुडारी ते कार्यकर्त्यां मेरेन सगळेच दीसरात प्रचाराक लागल्यात. हाचे उरफाटे मात काँग्रेस भाजपाच्या प्रचाराक भियेवन उमेदवार दिना, अशें सध्या दिसपाक लागलां. काँग्रेसीचो खासदार हे आदीं लोकां मेरेन पावूंक ना. ताका लागून काँग्रेसीक आतां तोंड दाखोवपाक लेगीत सुवात ना, अशें नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
