भांगरभूंय | प्रतिनिधी
डिसेंबर सावन कार्यावळीं खातीर अकादमी उक्ती
पणजी, प्रतिनिधी : दीनानाथ मंगेशकर सभाघरांत पावसात उदक भरपाची समस्या पयस जाल्ल्यान आतां कला अकादमीत वर्साक 365 दीस कार्यवळी आयोजित करप शक्य जातलें, अशे मुख्यमंत्री डॉ. प्रमोद सावंत हांणी सांगलें. पयलीं पावसाचे चार म्हयने कार्यावळी आयोजित करप शक्य जाय नासले.
५४ कोटी रुपया खर्च करून दुरुस्ती आनी नूतनीकरण केल्ले कला अकादमीचें आयज डॉ. सावंत हांचे हस्तुकीं उक्तावण जालें. ह्या वेळार जाल्ले खाशेले कार्यावळींत कला आनी संस्कृती मंत्री गोविंद गावडे, भौशिक बांदकाम मंत्री नीलेश काब्राल, आमदार आलेक्स रेजिनाल्ड, कला आनी संस्कृती संचालक सगुण वेळीप आनी हेर अधिकारी उपस्थित आशिल्ले.
नुतनीकरनाच्या कामाक लागून कला अकादमी फाटलीं तीन वर्सां बंद आशिल्ली. हाचो कलाकार तशेंच सामान्य लोकांक बरोच त्रास, मनस्ताप जालो. खंयचेय वास्तुक 50 वर्सा पुराय जालीं काय तिची दुरुस्ती करपाची गरज आसता. मंगेशकर सभाघरांत उदक भरपाचो प्रस्न आतां सुटावो जाला.आतां वर्साक 365 दीस कार्यावळी करप शक्य जातलें. कार्यावळीं खातीर डिसेंबर सावन बुकिंग सुरू जातलें, अशे डॉ. सावंत हांणी सांगलें. कलाकारांच्या आवाजान नवे कला अकादमींत नवें तेज तयार जातलें, अशें तांणी सांगलें.
कला अकादमी दुरुस्त करपाचो जो निर्णय सरकारान घेतिल्लो, तो योग्य आशिल्ल्याचें आतां सिद्ध जालां. पयलींचे कला अकादमींत जसो ब्लॅक बॉक्स आशिल्लो, तो त्या स्वरूपात परत हाडला. कलाकार तशेंच लोकांक आतां कलेच्या तशेंच हेर कार्यावळींक माची मेळ्ळ्या, अशे मंत्री गोविंद गावडे हांणी सांगलें.
कला अकादमीच्या उक्त्या थेटराची निविदा जारी जावन बेगीनुच दुरुस्ती जातली, अशे मंत्री नीलेश काब्राल हांणी सांगलें.
उक्तावणा निमतान आयज कला अकादमींत ‘इथे ओशाळला मृत्यू’ ह्या इतिहासीक नाटकाचो प्रयोग जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
