कर्नाटक खण खात्याची उपसंचालक प्रतिमाहिची हत्या, खुना फाटलें कारण कळूंकना
भांगरभूंय | प्रतिनिधी
बंगळुरू, खबरां संस्था : कर्नाटक सरकाराची वरिश्ठ बायल भूंय विज्ञानिकाचो शेनवारा रातीं बेंगळुरूंतल्या तिच्या घरांत खून जाला. तो वेवसायीक काय वैयक्तीक कारणांक लागून ताची चवकशी पुलीस करतात. कांय जाणांनी घरांत घुसून तिका मारल्या, असो पुलिसांक दुबाव आसा.
कर्नाटकाच्या खण आनी भूंय विज्ञानिक खात्याची उपसंचालक के. एस. प्रतिमा (45) दक्षीण बेंगळुरूच्या दोड्डकल्लासंद्रा वाठारांतल्या आपल्या घरांत मेल्ली मेळ्ळी. काल आमी ह्या प्रकरणांत एकल्याक अटक करतले, अशें पुलिसांनी जाहीर केल्लें. हो खून वैयक्तीक कारणांक लागून जाला अशें पुलिसांक दिसता.
घरांतल्यान कितें चोरून व्हरूंक ना, अशें पुलिसांनी सांगलें. दोन माळयेच्या घराच्या पयल्या माळ्यार प्रतिमा रावताली आनी तळमजल्यार आनीक एक कुटुंब रावतालें. शिवमोग्गा जिल्ह्यांत काम करपी तिचो घोव (शेतकार) हो खून जालो तेन्ना पयस आशिल्लो. तिचो पूत मंगळुरूच्या शाळेंत शिकता. तिची कूड तिच्या भावाक मेळ्ळी. प्रतिमान ताच्या फोनांक जाप दिवंक नाशिल्ल्यान तो थंय गेलो.
प्रतिमाचो खून गळो चिरिल्ल्यान जाला. शेजाऱ्यांनी पुलिसांक सांगलें, तांकां कसलोच आवाज आयकूंक येवंक ना. रातच्या 8- 8.30 वरां मजगतीं हो खून जाल्ल्याचो दुबाव आसा.
पुलिसांची चवकशी
प्रतिमा हांणी हालींच चवकशी केल्ल्या प्रकरणांची पुलीस म्हायती घेतात. एका बेकायदेशीर खडी खणीच्या प्रकरणांत प्रतिमा हांणी थंय वचून तपासणी केल्ली, उपरांत तिणें 25.35 लाख रुपया लुकसाणाचो उल्लेख करून सरकाराक अहवाल सादर केल्लो. ताचे उपरांत भाजपाचे एक आमदार आनी हेर तिगांचेर एफआयआर दाखल जालो.
ह्या प्रकरणांत प्रतिमा ही पुलीस आनी थळाव्या तहसीलदाराच्या संयुक्त तपास पंगडाची वांटो आशिल्ली. येलाहंका वाठारांतल्या 10 सुवातींनी बेकायदेशीर स्फोट आनी बेकायदेशीर कामाचेर तांणी नदर मारिल्ली. कुटुंबा भितर कसलेय मतभेद आसात काय नात तें सोदून काडपा खातीर पुलिसांनी प्रतिमाच्या कुटुंबा कडेन चवकशी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
