भांगरभूंय | प्रतिनिधी
पणजी, प्रतिनिधी : इलेक्ट्रीक बसी तशेंच ‘म्हजी बस’ येवजणे खाला कदंब म्हामंडळाक कांय प्रमाणात बसी उपलब्ध जाल्यात तरीय सध्या 200 बशींचो उणाव आसा. देखून कोणेय बस सुरू करपाची मागणी केली जाल्यार ती पुराय करप शक्य जायना, अशें कदंब येरादारी म्हामंडळाचे अध्यक्ष आमदार उल्हास तुयेंकार हांणी सांगलें.
पणजी ते गोंय विद्यापीठ मार्गाचेर कदंबाच्यो आयज सावन 2 इलेक्ट्रीक बसी सुरू जाल्यो. हे निमतान पणजे बस स्टँडाचेर जाल्ले कार्यावळींत तुयेंकार हांणी ही म्हायती दिली. बशींचो उणाव पयस करपाचे येत्न चालू आसात. बसी उपलब्ध जाता, तशो मागणी आसा त्या मार्गांचेर त्यो घालतले. इलेक्ट्रीक बसी पयलीं शारी वाठारांत घालतले, अशें तांणी सांगलें.
ड्रायव्हर तशेच हेर कर्मचाऱ्यांच्यो बऱ्योच समस्या आसतात. कांय जाण सोरो पियेवन कामाचेर येतात. तांचें समुपदेशन करपा सयत तांकां प्रशिक्षण दितले. हालींच सोरो पियेवन गाडी चलोवपी एका चालकाक निलंबित केला, अशेय तुयेंकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
