भांगरभूंय | प्रतिनिधी
प्रतिनिधी, पणजी: ऑक्युपन्सी प्रमाणपत्र दिवपाक कळाव केल्ल्यान चिंबलाच्या ज्येश्ठ नागरिकाक १५ दिसांनी पांच हजार रुपयांची भरपाय आनी तीन दिसांनी प्रमाणपत्र दिवपाचे आदेश उच्च न्यायालयान चिंबल पंचायतीच्या सचिवाक दिल्यात.
चिंबलच्या गणपती देशभंडारी (७७) हांणी पंचायत तशेंच नियोजन विकास प्राधिकरणाच्या संमतीन (पीडीए) आपल्या घराच्या पयल्या मजल्यार बांदकाम केल्लें. उपरांत २८ मार्च २०२२ दिसा तांणी चिंबला पंचायती कडेन अर्ज करून ऑक्युपन्सी प्रमाणपत्र दिवपाची मागणी केल्ली. देशभंडारी हांचो अर्ज १२ एप्रील २०२२ दिसा पंचायतीचे बसकेंत आयिल्लो. तशेंच तांकां ऑक्युपन्सी प्रमाणपत्र दिवपाचोय निर्णय जाल्लो. तरी पूण पंचायतीन ह्या अर्जाचेर फुडले स म्हयने कसलीच कारवाय करूंक ना. ताका लागून देशभंडारी हांणी हे विशीं पंचायत संचालकां कडेन कागाळ केली.
देशभंडारी हांचे कागाळीची दखल घेवन २८ सप्टेंबर २०२२ दिसा पंचायत संचालनालयाच्या गटविकास अधिकार्यांनी तिसवाडी गटविकास अधिकार्यांक चवकशी खातीर आपयल्ले. उपरांत २८ सप्टेंबर २०२२ ते एप्रील २०२३ ह्या काळांत पंचायत संचालनालय, चिंबल पंचायत तशेंच गटविकास अधिकार्यांनी हे विशीं कसलीच हालचाल करूंक ना. उपरांत तिसवाडी गटविकास अधिकार्यांनी चिंबल पंचायतीच्या सचिवांक १५ दिसांनी याचिकादाराक ऑक्युपन्सी प्रमाणपत्र दिवपाचें वा तातूंत कितेंय आडखळ आसल्यार तांकां तशे लेखी दिवपाचेय निर्देश दिल्ले. तरी पंचायत सचिवान हे विशीं कसलोच निर्णय घेवंक नाशिल्ल्यान ऑक्युपन्सी प्रमाणपत्र दिवंक नाशिल्ल्यान याचिकादार गणपती देशभंडारी हांणी १८ ऑक्टोबर २०२३ दिसा उच्च न्यायालयांत गेल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
