एम्सच्या अभ्यासा प्रमाण ह्या पिरायेच्या बायलांक स्तन रोग जावपाची शक्यताय

भांगरभूंय | प्रतिनिधी

दर वर्सा कॅन्सराच्या दुयेतींचो आंकडो वाडतूच आसा. ह्या दुयेंसाक लागून मरण येवपी लोकांचोय आंकडो वाडटा. आतां बर्‍यो उपचार सुविधा आसात तरी कॅन्सर हो अजूनय एक घातकी रोग जावन आसा. ताका लस वा वखद ना. मजगतीं, कॅन्सरा संबंदी नवें संशोधन भायर आयलां. नवी दिल्लीच्या एम्स कंपनीन हो अभ्यास केला. ह्या संशोधनाच्या मतान ४० वर्सां सकयल्या ३० टक्के बायलांक स्तनाच्या कॅन्सराक लागून मरण येता. म्हणल्यार, पयलीं हो कॅन्सर पिरायेच्या ६० वर्सां उपरांत जातालो, पूण आतां बायलांक ल्हान पिरायेचेर हो रोग जावपाक लागला. ह्या संशोधनाच्या मतान फाटल्या धा वर्सांत बायलां मदीं स्तनाच्या कॅन्सराचें प्रमाण सुमार ३५ टक्यांनी वाडलां. विस्कळीत जिणे पद्दत, चुकीची खावपाची संवय, सोरो पियेवप, स्थुलताय वाडप आनी उसरां लग्न जावप हीं ह्या दुयेंसाचीं मुखेल कारणां जावन आसात.
संवसारीक भलायकी संघटनेच्या अहवाला प्रमाण, संवसारांतल्या सुमार ३० लाख बायलांक स्तनाच्या कॅन्सराचो त्रास जाता. हातूंतल्या २० टक्के बायलांक मरण येता. भारतांत दर वर्सा ह्या दुयेंसाचे दुयेंती वाडतूच आसात. चडशे दुयेंती अजूनय निमाण्या पांवड्यार आसात ही हुस्को करपा सारकी गजाल. हाचें मुखेल कारण म्हळ्यार बायलांक ताचीं लक्षणां कळनात.
कॅन्सराचे दोतोर म्हणटात, स्तनाच्या कॅन्सराचे दोन प्रकार आसात. एक नॉन-इनवेसिव्ह आनी दुसरो इनवेसिव्ह. कांय प्रकरणांनी आनुवंशीक घटकांक लागूनय स्तनाचो कॅन्सर जाता. म्हणल्यार हो कॅन्सर एका पिळगेंतल्यान दुसरे पिळगेक वता. पूण पांच ते धा टक्के दुयेंतींकच अशें जाता. तेभायर चडशा प्रकरणांनी चुकीची खावपाची संवय आनी विस्कळीत जिणे पद्दत हें ह्या दुयेंसाचें मुखेल कारण.
स्तनाचो कॅन्सर जावचो न्हय म्हूण जिणे पद्दत सुदारप आनी आहाराची जतनाय घेवप गरजेचें. बायलांनी सोरो आनी सिगरेटी पसून पयस रावचें. जंक फूड जेवणा पसून पयस दवरचें. वजन नियंत्रणांत दवरचें. मोटसाण वाडूंक दिवची न्हय.

• स्तनाच्या कॅन्सराचीं लक्षणां

स्तनात गांठ
स्तनाची सूज
स्तनाग्र स्त्राव
स्तनाच्या आकारांत बदल
स्तनाग्र तांबडे जावप

• स्तनाचो कॅन्सर तपासणी पद्धती

मॅमोग्राम
बायोप्सी
अल्ट्रासावंड