एटीएमांतल्यान फकत पयशेच काडचे न्हय, हीं आठ कामांय एटीएम करून दिता

भांगरभूंय | प्रतिनिधी

एटीएम म्हळ्यार ऑटोमेटेड टेलर मशीन. तीं फकत पयशे काडपा खातीर तयार केल्लीं. लोकांक रोख पयशे काडपाचें हें एक म्हत्वाचें साधन जालां. आमी सगळेच रोकड काडपाक एटीएमांत वतात. पूण बँकींग संबंदीत हेर जायतीं कामां हें एटीएम मशीन करपाक शकता अशें तुमकां केन्ना दिसलां व्हय?
एटीएम मशीन बँकींग सेवांचो म्हत्वाचो घटक जावन आसा. तातूंत जायतीं खाशेलपणां आसात, जाका लागून तुमचीं बँकींग संबंदीत कामां सोंपी जातात.

एटीएम मशीनांत हीं 8 कामां पुराय करूंक शकता

एटीएम मशीनांतल्यान गिरायकांक खात्यांतल्यान पयशे काडपाक मेळटात. हाचे वांगडा 8 वित्तीय सेवा पुराय करपा खातीरूय हें मशीन उपेगी थारता.

1. कार्ड 2 कार्ड ट्रान्सफर: चडशा बँकांच्या एटीएम मशीनांत तुमी एका डेबीट कार्डांतल्यान दुसर्‍या डेबीट कार्डाचेर पयशे ट्रान्फर करपाक शकतात. ह्या ‘कार्ड 2 कार्ड’ हस्तांतरणाच्या आदारान बँकेच्या शाखेक भेट दिनासतना एका खात्यांतल्यान दुसर्‍या खात्यांत पयशे हस्तांतरीत करूं येतात. देशांतली सगळ्यांत व्हडली बँक एसबीआयच्या एटीएमांत 40 हजार रुपया मेरेन पयशे ट्रान्फर करपाची मर्यादा आसा.
2. क्रेडीट कार्ड पेमेंट: तुमी तुमच्या क्रेडीट कार्डाचें बील एटीएम मशीना वरवीं फारीक करूंक शकतात. पेपरलेस पेमेंटाक उर्बा दिवपा खातीर व्हिसा कार्ड कंपनीन चडश्या बँकींच्या एटीएमाचेर ही सेवा दिल्या.
3. विमा प्रीमियम भरप: तुमी तुमचो जीवन विमा प्रीमियम एटीएम मशीनाचेर भरूंक शकतात. एलआयसी सोडून एचडीएफसी लायफ आनी एसबीआय लायफचे विम्याचे हफ्ते एटीएम मशीना वरवीं भरपाक शकतात.
4. चेक बुकाची मागणी : तुमचो चेकबूक जर सोंपला आनी तुमकां बँकेंत वचपा खातीर वेळ ना. जाल्यार तुमी एटीएम मशिनाचेर ‘चेक बूक रिक्वेस्ट’ धाडपाक शकतात.
5. बिलां भरप: वीज बिलांय तुमी एटीएम वरवीं भरपाक शकतात. देशांतल्या चडशा राज्यांतल्या वीज मंडळांनी बँकांच्या एटीएम मशिनाचेर स्वताची वळेरी केल्या.
6. मोबायल बँकिंगाची नोंदणी: जर तुमकां तुमच्या बँक खात्या संबंदी सगळ्यो अपडेट्स तुमच्या मोबायलार मेळपाक जाय जाल्यार तुमी तुमच्या मोबायलार ही सेवा सुरू करपाक एटीएम मशीनाची मजत घेवपाक शकतात.
7. पीन बदलप : तुम्ही तुमच्या एटीएम कार्डाचो पासवर्ड ऑनलायन बदलपाक शकतातूच. पूण एटीएमांत गेल्यार तुमी हांगाय हें काम बरे तरेन करूंक शकतात.
8. खात्यात हस्तांतरण: तुमी एटीएम मशीनांतल्यान सरळ तुमच्या खात्यांत पयशे हस्तांतरीत करपाक शकतात. ताका लागून तुमकां ज्या खात्यांत पयशे, बचत वा करंट खात्यांत ट्रान्सफर करपाचें आसा त्या खात्याचो क्रमांक खबर आसप गरजेचें.