भांगरभूंय | प्रतिनिधी
इस्रायल गाझा पट्टे वयलो ताबो कायम दवरतलोः नेतन्याहू
रियाद, खबरां संस्था: अरब राष्ट्रांचे फुडारी आनी इराणाचे अध्यक्ष इब्राहिम रईसी हांचे मदीं सध्या सावदी अरेबियाची राजधानी रियाधांत आणीबाणीची बसका चलता. शेनवारा सांजवेळा सगळे फुडारी हे बसके खातीर जमिल्ले. अरब लीग आनी ऑर्गनायझेशन ऑफ इस्लामिक कोऑपरेशन (ओआयसी) हे संस्थेची आणीबाणी बसका घेवन झुजा संबंदीच्या बेगोबेग घेवपाच्या उपायांचेर चर्चा चलता, तातूंत गाझांत चली इस्राएल-हमास झूज हेर देशांनी पातळचे पयलीं तें बंद करपाचे मागणेचेरुय भासाभास चलता. मजगतीं, काल रातीं गाझाच्या हाॅस्पिटला भायर क्षेपणास्त्र पडून एका अर्भका सयत पांच जाणांक मरण आयलें. ह्या झुजांत आतां मेरेन शेंकड्यांनी लोकांक मरण आयलां. तशेंच अब्जांनी रुपयांचें लुकसाण जालां.
झुज सोंपले उपरांत इस्रायल गाझा पट्टी वाठारा वयलें आपले नियंत्रण, ताबो कायम दवरतलो, अशें इस्रायलाचे प्रधानमंत्री बेंजामिन नेतन्याहू हांणी आयज सकाळीं म्हणलां.
आदल्या येवजणे प्रमाण ‘अरब लीग’ आनी ‘ओआयसी’ ह्यो वेगवेगळ्यो बसका घेवपाच्यो आशिल्ल्यो. पूण ह्या दोनूय संघटनांची संयुक्त बसका जातली अशें सावदीच्या परराश्ट्र मंत्रालयान जाहीर केलें. गाझा आनी पॅलेस्टायनांतली स्फोटक परिस्थिती, धोक्याचो संघर्श आनी हजारांनी नागरिकांच्या जिवाक धोको आशिल्ल्यान ह्या झुजा संबंदी अरब आनी इस्लामी देशांचें एकूच धोरण थारावचें, एकजूट दिसची, हे खातीर ही बसका घेवपाचें थारलें, अशी म्हायती सावदी सरकाराच्या माध्यमांनी दिल्या.
पॅलेस्टायन आनी ताच्या नागरिकांक आदार, तेंको दिवपा खातीर अरब राश्ट्रां कडल्यान आंतरराष्ट्रीय फाटपुरवण करप, इस्राएलाचें आक्रमक धोरण आनी वाठाराचेर कब्जो करपाच्या घडणुकांचो निशेध करप आनी तांच्या गुन्यांवां खातीर तांकां जापसालदार धरप असो अरब लीगचो हेत आसा, अशें ह्या गटाचे सहाय्यक सरचिटणीस होसम झाकी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
