भांगरभूंय | प्रतिनिधी
मडगांव, प्रतिनिधी : इश्टां सयत कोलवें दर्यादेगेर न्हांवपाक गेल्लो वेलेंगिनो पिंटो (कोलवा) हो तरणाटो शुक्रारा दनपरां बुडलो. थळाव्या नुस्तेकारांनी जाळें मारून ताका सोदपाचो यत्न केलो, पूण तो गावूंक ना.
मेळिल्ले म्हायती प्रमाण, कोलवा दर्यादेगेर भुरगे खेळपा खातीर गेल्ले. फुटबॉल खेळून जाल्या उपरांत आपल्या तीग इश्टां सयत वेलेंगिनो न्हांवपाक दर्यांत गेलो. उदकाचो अदमास येवंक नाशिल्ल्यान सगळे जाण बुचकळपाक लागले. तिग जाण उदका भायर आयले, पूण वेलेंगिनो येवंक ना. थळाव्या नुस्तेंकारांनी रांपणेचें जाळें घालून ताका सोदपाचो यत्न केलो, अशें नुस्तेंकार ड्युमिंगो रॉड्रिग्ज हांणी सांगलें.
दर्याक भरती आयिल्ल्यान हे सुवातेर तांबडो बावटो लायला. तरीय हे चार जाण उदकांत देंवले. भरतेक लागून व्हडलीं ल्हारां आयिल्ल्यान तांकां उदकाचो अदमास येवंक ना आनी ते बुचकळपाक लागले. तांतल्या तिगांक उदका भायर येवपाक येस आयलें.
ड्युमिंगो रॉड्रिग्ज हांणी सांगलें : भरतीची वेळ आसून लेगीत हे भुरगे जेन्ना उदकांत देंवले तेन्ना लागसारच्या टॉवरावयल्या जीवरक्षकांनी तांकां भायर येवपाक सांगपाक जाय आशिल्लें. तांणी कसलेच तरेच्यो सुचवण्यो दिवंक ना. उदकांतल्यान भायर आयिल्ल्या एकल्यान धांवत येवन आपलो इश्ट बुडटा हें सांगलें आनी तांकां घेवन तो घडणुके सुवातेर आयलो. जाळें उडोवन ताका सोदपाचो यत्न केलो. ल्हारांनी व्हांवून वतना ताची कूड रेंवेंत रोमिल्ली आसल्यार ती जाळ्यांत मेळची ना. आतां सुकतेची वाट पळोवची पडटली अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
