भांगरभूंय | प्रतिनिधी
पणजी, प्रतिनिधी: आंतरराष्ट्रीय चित्रपट महोत्सवाच्या (ईफ्फी) फाटल्या चार आवृत्त्यांनी फकत २६९ आंतरराष्ट्रीय प्रतिनिधींनी नोंदणी केल्या आनी गोंय सरकारान २०१९ ते २०२२ मेरेन इफ्फी महोत्सव घडोवन हाडपा खातीर सुमार १०० कोटी रुपया खर्च केल्यात. तशेंच गोंय सरकाराक केंद्र सरकारा कडल्यान ११.८ कोटी रुपया मेळ्ळे. फाटल्या ४ वर्सांनी इफ्फीच्या अधिकृत विभागांत गोंयच्या फिल्म निर्मात्याचो फकत एक चित्रपट प्रदर्शीत जालो. भाजपा सरकारान इफ्फीचें रुपांतर देशी चित्रपट महोत्सवांत केलां हें ह्या आंकड्यां वयल्यान स्पश्ट जाता असो दावो विरोधी फुडारी युरी आलेमाव हांणी केला.
मुख्यमंत्री डॉ. प्रमोद सावंत हांकां फाटल्या पंदरा दिसां पयलीं हांवें इफ्फीची प्रतिनिधी नोंदणी, गोंय सरकारान केल्लो खर्च, चित्रपट महोत्सवाच्या आयोजना खातीर केंद्र सरकारा कडल्यान मेळिल्लो निधी हे संबंदीचो आंकडो जाहीर करपाचें आव्हान दिल्लें. आपलें आव्हान स्वीकारपाक मुख्यमंत्री अपेशी थारले. ताका लागून इफ्फीचीं तथ्यां आनी आंकडो आपल्याक भौशीक करचो पडलो अशें युरी हांणी फुडें सांगलें.
मुख्यमंत्री डॉ. सावंत हांणी विधानसभेंत दिल्लो डेटा आनी म्हायती प्रमाण आंतरराष्ट्रीय चित्रपट महोत्सवाच्या अधिकृत विभागांची येवजण करपाचो अधिकार आतां गोंय सरकारा कडेन वा मनरिजवण संस्थे कडेन ना. फकत रावपाची आनी येरादारीची वेवस्था करपाचीच जापसालदारकी सरकारा कडेन आसा. दर वर्सा जावपी व्हड खर्चाचे तुळेंत सरकारान इफ्फीचेर श्वेतपत्रिका जारी करून गोंय राज्याक इफ्फीचो प्रत्यक्ष फायदो कितलो जाता हाचेर उजवाड घालचो अशी मागणी आलेमावान केल्या.
२०१९ वर्सा जाल्ल्या ५० व्या इफ्फींत फकत ११६ आंतरराष्ट्रीय प्रतिनिधींनी वांटो घेतिल्लो, २०२१ वर्सा ५१ व्या इफ्फींत फकत ३३ आंतरराष्ट्रीय प्रतिनिधींनी वांटो घेतलो, २०२१ वर्सा ५२ व्या इफ्फींत ३७ परदेशी प्रतिनिधींनी नोंदणी केली जाल्यार ५२ व्या इफ्फींत फकत ८३ आंतरराष्ट्रीय प्रतिनिधींनी वांटो घेतलो. सरकारान दिल्ले म्हायती प्रमाण २०१९ ते २०२२ मेरेन इफ्फी खातीर नोंदणी केल्ल्या प्रतिनिधींचो आंकडो फकत २२,००३ आशिल्लो, तातूंतले ६४८० गोंयकार आशिल्ले अशें आलेमांव हांणी नदरेक हाडलें.
मुख्यमंत्री डॉ. सावंत हांणी दिल्ले जापे वयल्यान, इफ्फीच्या फाटल्या चार आवृत्त्यां खातीर सरकाराक फकत ४.५ कोटींचें प्रायोजकत्व मेळ्ळें. अजापाची गजाल म्हळ्यार इफ्फीच्या ५० व्या आवृत्तीचे मुखेल प्रायोजक गोवा शिपयार्ड लिमीटेड, गोंय कोयर वेवस्थापन म्हामंडळ आनी म्हायती तंत्रज्ञान हे सरकारी विभाग आशिल्ले. मेगा फिल्म फेस्टिव्हलाच्या भांगराळ्या महोत्सवी आवृत्ती खातीरूय सरकाराक कसलेच तरेचें खाजगी प्रायोजक मेळूंक ना हें कळ्ळां, अशें आलेमांव हांणी म्हणलें.
२०१९ ते २०२२ मेरेन आंतरराष्ट्रीय चित्रपट महोत्सवाच्या अधिकृत विभागांत गोंयच्या फिल्म निर्मात्यांचो एकूय चित्रपट दाखोवंक ना. फाटल्या वर्साच्या ५३ व्या इफिट इंडियन पॅनोरमाच्या अधिकृत विभागांत राजेश पेडणेकारान तयार केल्लो आनी साईनाथ उस्कयकार हाणें दिग्दर्शीत केल्लो वाग्रो हो फकत एक लघुपट वेंचून काडलो, अशें आलेमावान सांगलां.
गोंय फिल्म फायनान्स येवजण २००६ वर्सा कॉंग्रेस सरकारान सुरू केल्ली. दुर्दैवान गोंय मनरिजवण संघटणेन २०१२ ते २०१६ मेरेन ती गुठलायली. आयज मेरेन हे येवजणे खाला फायदो जाल्ल्या ३५ चित्रपटांतले सुमार ७५ टक्के चित्रपट कॉंग्रेस सरकाराच्या काळांत तयार जाले असो दावो युरी आलेमांव हांणी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
