भांगरभूंय | प्रतिनिधी
पणजी: उत्तर गोंयांतले एके बायलेचें नांव आनी फोटो वापरून बनावट इन्स्टाग्राम खातें उक्तें करून बदनामी केल्ल्या प्रकरणांत सायबर गुन्यांव विभागान मूळ चंद्रगड (कोल्हापूर) हांगाचो राहूल गंगाराम नाईक (22) ह्या तरणाट्याक अटक केल्या. अटक केल्ल्या तरणाट्याक 15 हजार रुपयांचे हमीचेर सुटका केल्या.
सायबर गुन्यांव विभागान दिल्ले म्हायती प्रमाण ह्या प्रकरणांत पिडीत बायलेन शेनवारा 19 वेर कागाळ दाखल केल्ली. ते प्रमाण अनवळखी मनशान पिडीत बायलेच्या नांवान तशेंच तिच्या फोट्याचो वापर करून इन्स्टाग्रामार बनावट खातें उक्तें करून तिची वळख चोरी केल्ल्याचें म्हणलां. तशेंच दुबावितान तिका आनी तिच्या सोयऱ्यांक अश्लील फोटे आनी संदेश धाडले.
हाची दखल घेवन सायबर विभागाचे पुलीस निरिक्षक देवेंद्र पिंगळे हांणी अनवळखी मनशा आड म्हायती आनी तंत्रगिन्यान कायद्याचें कलम 66सी आनी 67 खाला गुन्यांव दाखल करून चवकशी सुरू केली. ह्या वेळार विभागाक दुबावीत राहूल गंगाराम नाईक हो तरणाटो दुबावीत इन्स्टाग्राम खातें वापरीत आशिल्ल्याची म्हायती मेळ्ळी.
ते प्रमाण पुलीस उपअधिक्षक अक्षय कौशल हांच्या मार्गदर्शना खाला पुलीस निरिक्षक देवेंद्र पिंगळे हांच्या फुडारपणा खाला पुलीस उपनिरिक्षक विकास गावडे, विलास पाटील, कॉ. संयोग शेट्ये, इब्राहीम करोल, मयूर राणे, विराज नार्वेंकार, संदेश नायक, गौरेश गांवकार ह्या पंगडान रातीं उसरां दुबावीत राहूल गंगाराम नाईक हाका अटक केली. अटक केल्लो दुबावीत नाईक हाका बुधवारा 15 हजार रुपयांचे हमीचेर सुटका केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
