भांगरभूंय | प्रतिनिधी
हरमल, बातमीदार: केपकारवाड्या वयले खाजन मुणांग शेत जमिनींत खारें उदक घुशिल्ल्यान इबाडलां. हांगा शेती लागवड करप कठीण आसा. आदीं हांगा जायतीं पिकां घेताले. सध्या हांगा पीक घेवप कठीण जालां. उदकास्रोत वा पाटबंधारे खात्यान पावलां उबारचीं अशी मागणी शेतकरी बापू विर्नोडकार हांणी केल्या.
फाटल्या चार वर्सां सावन ह्या जमनी कडल्यान कांय अंतराचेर आशिल्लो बंधारो इबाडलो. योग्य तरेन पयशे खर्च केल्यार शेतकार सुखी, समाधानान हांगा परत पीक घेवपाक शकता. बंधार्याचो पांय सामको मोडूंक पाविल्ल्यान तो घटमूट करप गरजेचें. ताका लागून भरतेच्या वेळार त्या बांदल्यान खारें उदक शेत जमनींत घुसून बरी लागवडीची जमीन नापीक जाल्या. ह्या सुमार तीन हजार चौरस मिटर जाग्यार दर्याचें उदक घुशिल्ल्यान हे जमनीर कांयच करपाक मेळना, अशें म्हणून विर्नोडकार हांणी तिडक उक्तायल्या.
न्हंयच्या कांय अंतराचेर आशिल्लो बंधारो मुखेल कारण आशिल्ल्यान त्या बंधार्याची दुरुस्ती करपाची मागणी शेतकारांनी जायते फावट केल्या. सद्या सरकारी खातें हाचे कडेन लक्ष दिना. शेतकारां कडेन चर्चा करून बंधारो बांदप गरजेचें अशें मत विर्नोडकार हांणी उक्तायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
