आसगांवां मध्यानरातीं अपघात, गाडयेंत मेळ्ळ्यो बियरी
भांगरभूंय | प्रतिनिधी
म्हापशें । प्रतिनिधी ः बादें – आसगांवां रेंट अ कॅब मोटारीन रस्त्या कुशीक उबे आशिल्ले गाडयेक व्हड नेटान धपको दिलो. ह्या अपघातांत सूरज शर्मा (देहरादून) आनी अंकिता पाल (दिल्ली) हे दोन पर्यटक जखमी जाले. अपघाताच्या वेळार जखमी पर्यटक नशेंत आशिल्ले. कारीत बियरीच्यो बाटल्योय आशिल्ल्यो, अशें पुलिसांनी सांगलें.
शेनवारा मध्यानरातीं सुमार 2.15 वरांचे हो अपघात जालो. जीए 03 डब्लू 7033 क्रमांकाची रेंट अ कॅब मोटार शिवोले सावन आसगांवाचे वटेन वताली. चालकाचे गाडयेवेले नियंत्रण गेलें आनी रस्त्याचे उजवे वटेन तीन ते चार मिटराचेर उबी आशिल्ली अर्चना नायक हांचे जीए 03 आर 1174 क्रमांकाच्या वेगनर गाडयेक तिचो नेटान धपको बसलो.
ह्या अपघातांत सूरज आनी अंकिता हे दोगूय जखमी जाले. तशेंच दोनूय गाडयांचें व्हड लुकसाण जाले. गाडयेंत आडकून पडिल्ल्या जखमींक थळाव्या लोकांनी भायर काडले आनी म्हापशें जिल्लो हॉस्पिटलांत दाखल केले. थंयच्यान तांकां जीएमसीत धाडले. दनपारां उपचारा उपरांत दोगांकय डिस्चार्ज दिलो.
मजगतीं, तांचे मोटारींत बियरीच्यो बाटल्यो सांपडल्यो. देखून हे पर्यटक सोरो पियेवन गाडी चलयताले आनी हे नशेंत तांचें गाडयेचेर नियंत्रण उरलें ना आनी अपघात जालो अशें थळाव्यांनी पुलिशेक सांगलां.
रस्त्या कुशीक पार्क केल्ले गाडयेंत कोणूच नाशिल्लो. रस्त्यार चड येरादारी नाशिल्ली. ताका लागून आनीक कोणाक दुखापत जावंक ना. हणजूणे पुलिसांनी पंचनामा करून गाडी चालकाचेर गुन्यांव नोंद केला. पुलीस फुडली चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
