भांगरभूंय | प्रतिनिधी
मुख्यमंत्री: गरिबांच्या स्वताच्या घरा खातीर सरकाराचे यत्न
वास्को: कोमुनिदादीन ज्या लोकांक घरां बांदपा खातीर पत्रां दिल्यांत तांचीं घरां कायदेशीर करपा विशीं आमी कायदो हाडटले. येता ते विधानसभा अधिवेशनांत ह्या कायद्या संबंदी चर्चा करतले. आमचें सरकार हें मुंडकारांचें आसा, भाटकारांचें न्हय. ताका लागून जे मुंडकार आसात तांणी आपली घरां कायदेशीर करपा खातीर तशेंच बांदकाम करपा खातीर भाटकारां कडेन वचपाची गरज ना. जांणी कोमुनिदाद सोडून हेर सुवातांचेर 2014 वर्सा पयलीं अवैध रितीन घरां बांदल्यात तांणी ती नियमीत करून घेवची हे खातीर आमी कायदो केल्लो. पूण ताचो लाव घेवपा खामीर जाय तसो प्रतिसाद मेळ्ळो ना. आमी संबंदितांक तीन फावटी संद दिल्ली, पूण तांणी लाव घेतलो ना. जांणी अजून मेरन घरां नियमीत केल्लीं नात तांणी ती रोखडींच नियमीत करपा खातीर योग्य ते सोपस्कार करचे अशें आवाहन मुख्यमंत्री डॉ. प्रमोद सावंत हांणी केलें.
नवें वाडे आनी शांतीनगर सावन म्हामार्गाक जोडपी रेल्वे उड्डाण पुलाक समांतर असो नवो उड्डाण पूल रेल्वे वतीन बारा कोटी खर्च करून बांदतले. ह्या पुलाची बुन्याद डॉ. सावंत हांचे हस्तुकीं घाली.
ह्या वेळार पंचायत मंत्री मॉवीन गुदिन्हो, मुरगांवचे आमदार संकल्प आमोणकार, मुरगांवचे नगराध्यक्ष गिरीश बोरकार, चिखलीचे सरपंच कमलाप्रसाद यादव, नगरसेविका श्रध्दा महाले, आदले नगराध्यक्ष क्रितेश गांवकार, दाबोळी भाजपा मंडळ अध्यक्ष संदीप सूद, जिल्हो पंचायत वांगडी अनिता थोरात आनी हेर मानेस्त हाजीर आशिल्ले.
हांगा बांदकाम करता आसतना नौदळाचो दाखलो गरजेचो आसता. ते संबंदी डॉ. सावंत हांणी म्हणलें, रोखडेंच नागरी उड्डाण मंत्री, संरक्षण मंत्री हांचे सयत बसका घेतले. त्या वेळार ह्या प्रस्नाचेर उपाय काडटले. कांय जाण गरजे भायर बांदकामां आड कागाळी करतात. ते हे काम पयशे घेवपा खातीर करतात. तांकां ती संवय जाल्या. गरिबांचें एक घर आसचें हें सपन पुराय करपा खातीर डबल इंजीन सरकार यत्न करीत आसा अशें मुख्यमंत्री डॉ. प्रमोद सावंत हांणी म्हणलें.
मोपा विमानतळ जालो म्हूण कोणेंच दाबोळी विमानतळाच्या अस्तित्वा संबंदी भियेवपाची गरज ना. जांणी 30 ते 40 वर्सां पयलीं घरां बांदल्यांत, ते विशीं कांय जाण सकयल्या पांवड्याचें राजकारण खेळून ते मोडपाचो यत्न करीत आसात. ते खातीर ती अवैध घरां कायदेशीर करची अशी मागणी मॉवीन गुदिन्हो हांणी केली. जांकां कोमुनिदाद समितीन सुवात दिवन घरां बांदपाक परवानगी दिल्या तांकां त्रास जावचो न्हय अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
