… आनी रांकेंत राविल्ले शेंकड्यांनी लोक बेजार जाले!
भांगरभूंय | प्रतिनिधी
पणजी, प्रतिनिधी : सोर्तींचें पिशें कोणाक ना? गोंयकारांक तर इल्लें चडूच. तातूंत इनामां व्हडलीं आसता जाल्यार ती सोर्त अर्द आदेसा भितर खपता. वर्साक 350 लोक अपघात जावन मरतात, तरीय गाडी म्हणली काय पिशे जावपी गोंयकार आसात. केपें भौशीक गणेश मंडळाची सोर्त ही ते खातीर लोकप्रीय. एका दिसांत तांच्यो सगल्यो सोर्ती खपतात. ब्लॅकान पसून मागीर त्यो विकतात. अंदूंय तशेंच जालें. केपेंचे सोर्तीचें आयज आयतारा पालिका बागेंत लोकार्पण आशिल्लें. पूण लोकांनी घिट्टी घाली, गचमुड्डी जाली… आनी त्या बोवाळांत सोर्ती विकपाचो कावंटर मोडिल्ल्यान विक्री 10 मिनटांनी बंद जाली. लोक बेजार जाले खरे, पूण गर्देक लागून कितेंय दुर्घटना जाल्ली जाल्यार आयोजक त्रासांत पडपाचे. सोर्ती विकप बंद केल्ल्यान समितीन लोकांची माफी मागल्या.
आतां सोमारा 28 आॅगस्टाक सकाळीं साडेणवांक केपें सरकारी म्हाविद्यालयाच्या आॅडिटोरियमांत सोर्तीचें प्रकाशन जातलें. फाल्यांय शेंकड्यांनी लोकांची गर्दी जातली, म्हूण आयोजकांनी फावोशी वेवस्था केल्या.
गाडयोच गाडयो
ही सोर्त 300 रुपया एक. सोर्तीचीं पयलीं 10 इनामां आलिशान गाडयो. 7 स्कुटरीय आसात. गाडयो वा रोख रक्कम अशा स्वरुपाची ही सोर्त. दरवर्सा आकर्शक इनामां आशिल्ली ही सोर्त रोखडीच खपता. आयताराय गर्दी जाल्ली. लोक वाडत गेले आनी अखेरेक कावंटरूच मोडलो आनी आयोजकांनी सोर्ती विकप बंद केलें. त्यावेळार गोंय आनी शेजराच्या राज्यांतल्यान खास आयिल्ले शेंकड्यांनी लोक रांको लावन उबे आशिल्ले. साहजिकूच ते बेजार जाले.
हे सोर्तीचें प्रकाशन खासदार सदानंद तानावडे, समाजकल्याणमंत्री सुभाष फळदेसाय, बांदकाम मंत्री नीलेश काब्राल, केपेंचे आमदार अल्टन डिकाॅस्ता, आदले आमदार चंद्रकांत कवळेंकार हांचे हस्तुकीं जालें. सुवाळ्या उपरांत विक्री सुरू जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
