भांगरभूंय | प्रतिनिधी
केपें, प्रतिनिधी : केपें नगरपालिका बसकेंत नगरसेवक अमोल काणेकार आनी मुख्याधिकारी मधू नार्वेंकार हांचे मदीं आरोप- प्रत्यारोप एकामेकांचेर केल्ल्यान मुख्याधिकारी बसकेंतल्यान उठून गेले. उपरांत बसका फुडें धुकल्ली.
नगराध्यक्ष सुचिता शिरवयकार हांचे अध्यक्षते खाला बसका घेतली. हे बसकेंत केपें नगराध्यक्ष सुचिता शिरवयकार , मुख्याधिकारी मधू नार्वेंकार, उप नगराध्यक्ष विल्यम फर्नांडीस, नगरसेवक अमोल काणेकार, चेतन हळदर्णकार, प्रसाद फळदेसाय, आलिन्डा लासेन्डा, जाकिना डायस, नंदिता प्रभू देसाय हाजीर आशिल्लीं.
ही बसका सुरू जातकच फाटले बसकेचो अजेन्डा वेळार मेळनाशिल्ल्याचो प्रस्न नगरसेवकांनी मुखार काडलो. ताका लागून चार दिसां पयलींच सगळ्या नगरसेवकांच्या हातांत अजेन्डा मेळपाक जाय, अशी मागणी केली. उपरांत फाटले बसकेचो आढावो वाच्चो, ना जाल्यार बसका रद्द करची अशी मागणी काणेकार हांणी केली. हे मागणेक हेर नगरसेवकांनी फाटबळ दिलें.
ही बसका सुरू जातकच विजया एन्जसींतल्या (आवट सोर्स) कामगारां मदल्या फकत दोगांचेच पगार कित्याक वाडयले, ह्या प्रस्नाचेर नगरसेवकांनी नेट धरलो. सगळ्या कामगारांचो पगार वाडोवचो अशी मागणी विल्यम फर्नांडीस हांणी केली. विजया एजन्सीच्या कामगारांच्या नांवाचें लिस्ट घेवचें. तशेंच १३ मदल्या फकत दोग जाणांचो पगार कित्याक वाडयलो हो मुद्दो श्री. काणेकार हांणी बसकेंत काडलो. मुख्याधिकारी नार्वेंकार हांकांय जाब विचारलो.
ह्या वेळार नगरसेवक काणेकार आनी मुख्याधिकारी नार्वेंकार हांचे मदीं आरोप, प्रत्यारोप सुरू जाले. उपरांत मुख्याधिकारी अचकीत थंयच्यान उठून गेले. मागीर बसका मुखार धुकल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
