भांगरभूंय | प्रतिनिधी
मडगांव, प्रतिनिधी : आमदार निलेश काब्राल हांचे विशीं घेतिल्लो निर्णय पक्षाच्या वरिश्ठांनी तांकां विस्वासांत घेवन घेतला. ताका लागून कोणेंच अस्वस्थ जावपाची गरज ना. राज्य सरकाराचें काम सुरळीतपणान चालूच आसा. सरकारांत खंयचोच आमदार रागार ना. सध्या आनीक खंयच्याच मंत्र्याक काडपाचे नात, अशें मत सभापती रमेश तवडकार हांणी उक्तायलें.
मडगांवां कार्यावळी निमतान आयिल्ले सभापती रमेश तवडकार हांणी राज्यांतले आमदार रागार ना अशें म्हणलें.
आमदार अपात्रता याचिकेर सुनावणी सुरु आसतना आलेक्स सिक्वेरा हांकां मंत्रिपद दिवपाक कॉंग्रेस प्रदेशाध्यक्ष अमित पाटकार हांणी विरोध करीत हे विशीं सभापतींक पत्र दिलां. हे विशीं सभापतीन सांगलें, विरोधक लोकशायेंत आपापली बाजू मांडपाक शकतात. ही मेकळीक लोकशायेंत आशिल्ल्यान अमित पाटकार हांणी मागणी केल्या. ताचेर कितें निर्णय घेवचो हें आमी पळयतले, अशें तांणी सांगलें.
राज्यांतल्या फेरबदलाक लागून आमदारां मदीं अस्वस्थताय पातळ्ळ्या. आनीक कांय मंत्र्यांक मंत्रीमंडळांतल्यान काडटले अशीय चर्चा आसा. हे विशीं विचारलें तेन्ना सभापती तवडकार हांणी सांगलें, राज्य सरकारांतले आमदार रागार आसात अशें आपल्याक दिसना. मंत्रिमंडळांत केल्ले बदल हे निलेश काब्राल हांकां विस्वासांत घेवनूच केल्यात. पक्षाच्या वरिश्ठांनी तांकां हे विशीं कल्पना दिल्ली. कॉंग्रेसींतल्यान आयिल्ल्या आमदारांक कसलेंय पद दिवपाची गरज आशिल्ली. मात मंत्रिमंडळ पुरायेन भरिल्लें. अशा वेळा पक्षांतल्या वरीश्ठ फुडार्यांनी एकदां निर्णय घेतल्यार तो मानपाची गरज आसा. मुख्यमंत्र्यां कडेनूय हे विशीं चर्चा जाल्या. कोणेंच अस्वस्थ जावपाची गरज ना अशें तांणी फुडें म्हणलें.
आनीक दोग मंत्र्यांक काडपाचे चलिल्ले चर्चे विशीं विचारलें तेन्ना सध्यातरी कोणाकूच मंत्रीमंडळांतल्यान काडपाचो विचार ना. प्रसारमाध्यमां वरवीं खुबश्यो चर्चा येतात. पूण तशें आसताच अशें ना अशेंय तवडकार हांणी म्हणलें.
शिंयाळी अधिवेशन एका सप्तकाचें : सभापती
विधानसभा अधिवेशनांचें सत्र हें म्हयनोभर पयलीं थारता. कामकाजा विशींच्या विशयांचेर आठ दिसां पयलीं चर्चा करतात. ते विशीं आजूनय बसका जावंक ना. ह्या वेळार सुमार एका सप्तकाचें अधिवेशन आसतलें अशी म्हायती तवडकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
