भांगरभूंय | प्रतिनिधी
दोन वर्सां पयलीं सनबर्न महोत्सवांत जाल्ली मारपेट
गोळजुंवें चॉपर हल्लो प्रकरण
म्हापशें: दोन वर्सां पयलीं सनबर्न महोत्सवा वेळार मारपेट केल्ल्याचे आदले दुस्मानकायेंतल्यान दुबावीत दिगंत नायक (24, पिलार, तिसवाडी) हाणें जखमी प्रणव फडते (23, गोळजुंवें, खोर्जुंवें) हाचेर चॉपरान हल्लो कलो अशें पुलीस चवकशेंत उक्तडार आयलां. दुबावीत दिगंत आनी ताचो वांगडी उस्मान खान (29, आगशी, तिसवाडी) ह्या दोगांकूय म्हापशेंच्या न्यायालयान स दिसांची पुलीस कोठी दिल्या.
मंगळारा 20 वेर म्हापशें पुलिसांनी दोनूय दुबावितांक हांगासरल्या पयलो वर्ग न्यायालयांत हजर करतकूच न्यायालयान पुलीस कोठयेंत दवरपाचो वयलो आदेश दिलो. दोनूय दुबावितांक पुलिसांनी सोमारा सांजवेळा धरले आनी अटक केल्ली.
दोन वर्सां पयलीं वागातोरा सनबर्न महोत्सवा वेळार प्रणव फडते हाणें दिगंत नायक हाका बेठीच मारपेट केल्ली. ही तिडक दुबावीत दिगंताक आशिल्ली. फाटल्या 15 फेब्रुवारी दिसा घडणुकेच्या दिसा रातीं उसरां आरोपी खोर्जुंव्यां आयिल्ले. तेन्ना ते रस्तो चुकले. वाटेर रस्त्यार चलून वचपी तरणाट्याक तांणी मोटार थांबोवन वाट विचारली. तेन्ना दुबावीत दिगंत हाणें प्रणव फडतेक वळखलो. जाणें दोन वर्सां पयलीं ताका मारपेट केल्ली. मोटारींतल्यान देंवून दुबावीत दिगंत हाणें ताका जाप विचारली. थंयच तांचे मदीं धक्काबुक्की जाली. उपरांत दुबावितान आपले कडेन आशिल्ल्या चॉपरान जखमीचेर हल्लो केलो आनी थंय सावन दुबावितांनी पळ काडलो. ह्या हल्ल्यांत प्रणवाच्या दोनूय हातांक जखम जाली. ताचेर गोमॅकाँत उपचार सुरू आसात.
मजगतीं, पुलिसांनी ह्या हल्ल्या वेळार दुबावितांनी वापरिल्ली जीए 07 के 5363 ही मोटारूय जप्त केल्या. फुडलो तपास पुलीस निरिक्षक निखील पालेकार हांच्या मार्गदर्शना खाला उपनिरिक्षक बाबलो परब करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
