आदर्श आनी प्रेरणा दिवपी जोडप्याचो वेवसाय

भांगरभूंय | प्रतिनिधी

घोव ड्रायव्हर तर बायल कंडक्टर

म्हापशें, उमेश झर्मेकार : झरवाडो- शापोरांतले चंदन बेतकार आनी कविता बेतकार हे जोडपे फाटलीं पांच वर्सां आसगांव- बादें- म्हापशें मार्गाचेर स्वताची प्रवासी बस चलयता. ह्या बशींत चंदन ड्रायव्हर आनी ताची घरकान्न कविता कंडक्टर म्हणून जापसालदारकी सांबाळटा. हो तांचो वेवसाय हेरांक आदर्श आनी प्रेरणा दिवपी आसा.
खंयचेंय काम उणाक दर्जाचें ना आनी हेच आवडीन हांव आनी म्हज्या घोवान बस वेवसाय करपाचें थारायलें. विशेश म्हळ्यार म्हज्या सासूमांयच्या प्रोत्साहनाक लागून हांव म्हज्या घोवाक बस कंडक्टर म्हूण मजत करता अशें कविता हिणें सांगलें. कविता 10 वी मेरेन जाल्यार चंदनाचें शिक्षण 9 वी मेरेन जालां.
चंदन आनी कविता ह्या प्रवासी बस चालक- कंडक्टर हांचें लग्न 2008 वर्सा जालें. तांकां तीन भुरगीं आसात. हांव वीस वर्सां सावन बस चलयता. ताचे आदीं हांवें मेळ्ळीं तीं कामां केलीं. म्हजो बापूय तुळसीदास बेतकार कदंब म्हामंडळांत बस चालक म्हणून काम करतालो. तेन्ना सावन म्हाका बस चलोवपाची आवड. बापूय निवृत्त जाले उपरांत सुरवेक हांवें कदंब म्हामंडळांत नोकरी मेळोवपाचो यत्न केलो, पूण तातूंत येस मेळ्ळें ना अशें चंदन हांणी सांगलें.
स्वताची बस सुरू करचे पयलीं धा वर्सां ड्रायव्हर म्हणून हांवेन काम केलें. ज्या बसीचेर हांवेन 10 वर्सां ड्रायव्हर म्हणून काम केले तीच बस त्याच मालका कडल्यान 2019 वर्सा विकत घेतली. ते खातीर बँकेंतल्यान रीण घेवन गाडी दुरुस्त केली.
एप्रिल 2019 वर्सा आसगांव- बादें- म्हापशें मार्गाचेर आमी स्वताची बस सेवा सुरू केली. पूण, दोन म्हयने उपरांत जुनांत चंदनाचो अपघात जालो आनी तो दोन म्हयने घरांत उरलो. ह्या वेळार आमकां आमचो इश्ट सुमित जोशी आनी रितेश गडेकार हांचो आदार मेळ्ळो. ह्या दोगांयनी आमची बस सांबाळली. दोन म्हयन्यां उपरांत चंदन बरो जालो आनी आमी परतून आमचें काम सुरु केलें, अशें कविता बेतकार हांणी सांगलें.
वेवसाय बरो चलतालो. त्याच वेळार 2020 वर्सा कोरोनाची महामारी आयली. सुमार देड वर्सां आमची बस बंद उरली. ह्या काळांत अर्थीक नदरेन खूब त्रास सोंसचे पडले. कोरोना उपरांत आमकां परतून मेकळींक मेळ्ळी आनी तेच नवे उर्बेन ही बससेवा सुरू करून आमी परतून प्रवाशांक सेवा दिवपाक सुरवात केली. बस सेवा सुरू करपाचो आमचो हेत म्हळ्यार प्रवाशांक बरी सेवा दिवप. प्रवाशां कडेन आशिल्लो संबंद आनी मनीसपण तिगोवन दवरप हो म्हजो आनी कविताचो मुखेल हेतू. खंयच्याच कर्मचाऱ्याक असुविधा जावची न्हय हाची आमी सदांच जतनाय घेतात आनी कांय कारणांक लागून बस बंद दवरची पडल्यार प्रवाशांक आमी आदींच सुचोवणी दितात अशें जोडप्यान सांगलें.
आमी दिसाक यो – वच 6 अश्यो मेळून वट्ट 12 बस ट्रीप मारता. ह्या वेवसायाक लागून घरांत भुरग्यांक फावो तो वेळ दिवप शक्य जायना. ही दुख्खाची गजाल, पूण सासूमाय संजीवनी बेतकार भुरग्यांक सांबाळून घराची जतनाय घेता. तशेंच सासूमाय आनी म्हजी आवय गोदावरी वाघधरे ह्या दोगांयनी म्हाका आनी म्हज्या घोवाक ह्या बस वेवसायांत खूब मजत केली आनी प्रोत्साहन दिलें. खंयचेंय काम उण्या दर्जाचें ना आनी काम करपाक लज धरची न्हय ही तांची शिकवण आसा. देखून आमी दोगूय हे उर्जेच्या बळार ही बस सेवा चलयतात अशें कविता हांणी सांगलें.

कदंब बशींत कंडक्टर आशिल्ली : कविता
कंडक्टर म्हणून बशींत चडचे पयलीं हांव कदंब म्हामंडळाच्या गाडयांनी कंडक्टर आशिल्ली. खाजगी बशींत बायलो कंडक्टर क्वचीत आसतात. सुरवेक आमचे गाडयेंत बसपी प्रवाशांक बशींत बायल कंडक्टर आसा हे पळोवन अजाप दिसतालें. पूण खंयच्याच प्रवाशा कडल्यान म्हाका केन्नाच वायट अणभव आयलो ना. आयज जायते प्रवासी आमचे बशीची वाट पळयतात अशें बेतकार हिणें सांगलें.