भांगरभूंय | प्रतिनिधी
महाबूबी फक्रुद्दीन टक्केद काजी मृत्यू प्रकरण
म्हापशें: पर्वरे महाबुबी फक्रुद्दीन टक्केद काजी (33) हिका आत्महत्येक प्रवृत्त केल्ल्याच्या आरोपा खाला पुलिसांनी घरकार आनी कुटुंबां आड गुन्यांव दाखल केला.
ह्या प्रकरणांत मयतीचो भाव अन्वरसाब टक्केद (गदग, कर्नाटक) हाणें कागाळ दाखल केल्या. मयतीन फाटल्या 24 ऑगस्ट 2023 दिसा आपल्या पेन्ह द फ्रांका आल्तो पर्वरे हांगासरल्या पोरण्या पुलीस क्वार्टसांतल्या रावत्या घरांत आत्महत्या करपा हेतान टॉयलेट क्लिनर अॅसीड पियेल्ली.
तिका जखमी अवस्थेंत पयलीं गोंयच्या हॉस्पिटलांत दाखल केल्ले. उपरांत तिका बंगळुरू सिटी हॉस्पिटलांत व्हेली. थंय तिका 29 सप्टेंबर 2023 दिसा मरण आयिल्लें.
आपले भयणीचो तिचो घरकार नबीसाब काझी (38), सासुमांय अत्तरबानू काझी (60), मांव फक्रुद्दीन काझी, देर सलीम काझी (32) आनी जाव नजमीन सलीम काझी (28) हांणी संगनमतान छळ केलो आनी ताका लागून तिणें आत्महत्येचें पावल उबारलें अशी कागाळ कागाळदार टक्केद हाणें पुलिशेंत दाखल केल्या.
ते प्रमाण पुलिसांनी वयल्या दुबावितां आड भादंसंच्या 306 आनी 34 कलमा खाला गुन्यांव नोंद केला. फुडलो तपास पुलीस निरिक्षक राहूल परब हांच्या मार्गदर्शना खाला उपनिरिक्षक प्रतीक प्रभू भट करतात.
मजगतीं, मयतीच्या लग्नाक 11 वर्सां जाल्लीं. तशेंच तांकां दोन भुरगींय आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
