भांगरभूंय | प्रतिनिधी
मडगांव, प्रतिनिधी ः आगाळी- फातोड्डें हांगा रावपी मुळ उत्तर प्रदेशांतल्या जोडप्याच्या एक म्हयनो पिरायेचे चलयेक मरण आयलें. रातच्या वेळार दूद दिवन ते चलयेक आवय वांगडा घेवन न्हिदिल्ली. सकाळीं चलयेची कांयच हालचाल नाशिल्ल्यान तिका हॉस्पिटलांत व्हेली, पूण थंय तिका मरण आयिल्ल्याचें जाहीर केलें. चलयेक अचकीत मरण आयिल्ल्यान तिच्या पालकांक धक्को बसलो. पुलिसांनी हे प्रकरण अनैसर्गिक मरण अशें नोंद केला.
मेळिल्ले म्हायती प्रमाण, कामा निमतान उत्तर प्रदेशांतल्यान गोंयांत आयिल्ले कुटुंब फातोड्ड्यां रावता. सोमारा रातीं आवयन एक चलयेक दूद दिलें आनी दोगांय न्हिदलीं. सकाळीं उठले उपरांत आवयक चलयेची हालचाल कांयच जायना हें लक्षांत आयलें . उपरांत ताका हॉस्पिटलांत व्हेलें. आवय दूद दिता आसतना भुरग्यांच्या स्वास घेवपाच्या पायपात दूद भितर सरलें आसूं येता. ताका लागून भुरग्याक मरण आयलें आसूं शकता, असो अदमास दोतोरांनी उक्तायला. हे प्रकरण पुलिसांनी अनैसर्गिक मरण म्हणून नोंद केलां. फातोड्डें पुलीस निरिक्षक दितेंद्र नायक हांच्या मार्गदर्शना खाला उपनिरिक्षक अमिन नायक फुडली चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
