सैनिक कल्याण खात्याचे संचालक आनी सचीव पदां खातीर जायरात

भांगरभूंय | प्रतिनिधी

भांगरभूंय । प्रतिनिधी
पणजीः सैनिक कल्याण खात्यान संचालक आनी सचीव, राज्य सैनिक मंडळ ही पदां भरपा खातीर अर्ज मागल्यात. संचालक आनी सचीव ह्या पदां खातीर आदले ब्रिगेडयर दर्जाचो वा त्या पातळेचो सैन्य अधिकारी आसप सक्तीचें आसा.
गृह खात्यान उजावाडाक हाडिल्ले जायराती प्रमाण, सैनिक कल्याण खात्यांतल्या संचालक आनी सचिव पदाची पगार श्रेणी पांवडो 10 आसा. हें पद संबंदीत अधिकाऱ्यांचे समाधानकारक कामगिरीक अणसरून पांच वर्सांच्या काळा खातीर वा पिरायेच्या 65 वर्सा मेरेन आसतलें.
निवड आनी रोजगारा खातीर उमेदवारांनी पात्रताय निकशांचें पालन करप गरजेचें आसा. हातूंत उमेदवार नौदळ वा हवाई दळांतलो ब्रिगेडियर वा समकक्ष दर्जाचो आदलो सैनिक अधिकारी आसचो. उमेदवाराची पिराय 60 वर्सा परस चड आसूंक जायना. उमेदवाराची फाटले सेवेची नोंद नितळ आसची आनी ताचें चारित्र्य बरें आसचें. उमेदवारान डीजीआर, ईसीएचएस, आरएसबी, झेडएसबी वा ईएसएम कोट्या खाला रोजगाराचो लाव वा ईएसडब्ल्यू रिसेटलमेंट घेतिल्लो आसूंक फावना. उमेदवारान हे विशींचें हमीपत्र दिवप गरजेचें आसा.
इत्सूक उमेदवारांनी गृह खात्याक आपल्या बायो डाटा वांगडा 20 मे 2026 दिसा वा ते आदीं लेखी अर्ज करूं येता, अशी सुचोवणी गृह खात्यान जारी केला.
हे विशीं अदीक म्हायती दितना गोंय निवृत्त सैन्य अधिकारी कल्याण संघटनेचे अध्यक्ष भालचंद्र आमोणकार हांणी सांगले, आदले सैनिकांक सतावपी विशय सोडयतले आसत जाल्यार आदलो सैन्य अधिकारी हो संचालक पदाचेर आसचो अशी आमी कितलीशीच वर्सा मागणी करताले.
सद्या गृह खात्यान संचालक पद हे सचिव पदाचे अपग्रेड केला. ह्या पदा खातीर गोंय नागरी सेवेतलो ब्रिगेडीयर दर्जाचो अधिकारी आसप सक्तीचे. देखून संघटनेच्या वतीन ह्या पदा खातीर गोंयचे पुत ब्रिगेडीयर एलन परेरा ह्या पदा खातीर अर्ज करतले, अशें आमोणकार हांणी सांगलें.