अपघातांत मरण आयिल्ल्याच्या कुटुंबाक 15 लाख 47 हजार
भांगरभूंय | प्रतिनिधी
लवादाचो लुकसाण भरपाय दिवपाचो आदेश
पणजी, प्रतिनिधी : बांबोळे णव वर्सां पयलीं जाल्ल्या दुचाकी आनी मोटारीच्या अपघातांत मरण आयिल्ल्याच्या कुटुंबाक 15 लाख 47 हजार रुपया लुकसाण भरपाय दिवपाचो आदेश उत्तर गोंय मोटार वाहन अपघात लवादान दिला.
मिलिटरी कॅम्पा लागसार 2014 त हो अपघात जाल्लो. मोटारसायकलीन मडगांवच्यान पणजे वचपी सूरज चव्हाण हाका मोटारीचो धपको बशिल्लो. ही गाडी दीपक शर्मा चलयतालो. मोटारी वयलो ताबो सुटिल्ल्यान हो अपघात जाल्लो. जखमी सुरजाक हाॅस्पिटलांत व्हरतना मरण आयिल्लें.
अपघाता उपरांत सूरजाच्या कुटुंबान लवादा मुखार लुकसाण भरपायेची केश दाखल केल्ली. मोटार चालक आनी विमो कंपनी प्रतिवादी केल्ले. चव्हाण कुटुंबान 20 लाखांची भरपाय मागिल्ली. सूरज हो ड्रायव्हर म्हूण काम करतालो. ताका म्हयन्याक साडेसात हजार रुपया पगार मेळटालो. ताका मरण आयिल्ल्यान घरांतलो जोडकार गेला, अशें केशींत म्हणिल्लें.
मोटारधनयान दुचाकी चलोवपी सूरज स्वताचे चुकीक लागून गेलो, असो युक्तीवाद केल्लो. मात लवादान तो ग्राह्य धरूंक ना आनी 15 लाख 47 हजार रुपया लुकसाण भरपाय दिवपाचो आदेश दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
