भांगरभूंय | प्रतिनिधी
-संभाजी भिडे हांचो गोंयकार तरणाट्यांक उलो
मडगांव : हिदुस्थान हे हिंदूराष्ट्र आसून ह्या राष्ट्राचो राष्ट्रध्वज भगवोच आसपाक जाय. हे खातीर देशभरांत प्रचार करतले. गोंयांतल्या तरणाट्यांकूय एकठांय हाडपाचो यत्न जावचो, अशें आवाहन श्री शिवप्रतिश्ठान हिंदुस्थानचे संभाजी भिडे हांणी केलें.
अखील गोंय हिंदू धर्म सभे वतीन गोंयांत दवर्ले श्री शिवप्रतिश्ठान हिंदुस्तानच्यो संभाजी भिडे हांणी व्याख्यान दितना हिंदू समाजान अत्याचार सोंसून घेनासतना ताचे आड आवाज काडपाची गरज आशिल्ल्याचे म्हणलें.
हिंदुस्थानांत राज्य करपाक आयिल्ल्या इंग्रजांनी हांगाच्या समाजाची वृत्ती पळयिल्ली. ह्या देशांतली व्यक्ती आत्मकेंद्री आसा. मुस्लीम राज्यकर्ते क्रूर आसले तरी परतून जाप दिवपाची वृत्ती भारतांतल्या समाजाची आसा, अशें इंग्रजांनी पत्रा वरवीं इंग्लंडाक कळयिल्ले. देश, धर्म, समाज, राष्ट्र हांचे कडेन लक्ष दिवपी समाज ना, अशें तांणी कळयिल्ले. आतांय तातूंत फरक पडूंक ना, अशें भिडे हांणी म्हणलें.
हिंदूंचे राज्य, हिंदूंची संस्कृती हाची राखण करपी राज्य म्हणल्यार हिंदवी स्वराज्य. हिंदवी स्वराज्याचे सपन छत्रपती शिवरायांनी पळयिल्ले. 35 वर्सांच्या काळांत शिवछत्रपती हिंदवी स्वराज्याच्या स्थापने खातीर लडले. मुस्लिमां कडल्यान हिंदूंचेर अत्याचार जाले. पूण हिंदू सर्वधर्मसमभाव म्हणत शांत आशिल्ले, आतांय शांतूच आसात, अशेंय संभाजी भिडे हांणी म्हणलें.
1885 त ह्यूम इंग्रज अधिकाऱ्यान अखील भारतीय काँग्रेस समिती स्थापन केली. 1921 त गांधींनी शस्त्रांनी स्वातंत्र्य मेळचें ना, मेळ्ळें जाल्यार तिगचें ना. अहिंसा, शांतताय, सत्य आनी असहकार करात, हें सूत्र महात्मा गांधींनी सांगलें आनी लोकांनी ते स्विकारले. तशेंच चळवळीच्या निमतान ऑल इंडिया काँग्रेस पक्षाच्या पयल्या अधिवेशना पसून मरणा मेरेन तेच अध्यक्ष आशिल्ले. 1930 च्या अधिवेशनांत सशस्त्र लढो जावचो, तशेंच स्वातंत्र्या उपरांत तिरंगो भगवोच आसचो अशें थाराव घेतिल्ले.
शिवरायांच्या पुतळ्याची विटंबणा जावनूय हिंदू शांतच
हिंदुस्थानाचेर जायतीं आक्रमणा जालीं आनी तातूंत हिंदुंचेर सदांच अत्याचार जाले. जगांतल्या 39 मुस्लीम देशांनी हिंदुस्थानाचेर आक्रमणां केली. आतां चीन आयलां. छत्रपती शिवरायांच्या पुतळ्याची विटंबणा जावनूय हिंदू शांतूच आसात, अशें संभाजी भिडे हांणी सांगलें.
गांधींनी लोकांक पिशें केले आनी देशांत हिरो जाले
इंग्रजांनी मराठा बटालियनाच्या नेटार जगांतली जायतीं राज्यां ताब्यांत घेतली. पयलेच खेपे 30 हजार आनी उपरांत एक लाखांची मराठ्यांची बटालियन केली. स्वातंत्र्यलक्ष्मी भगवो तिरंगो घेवन लढली आनी बंदखणींत गेली. मात स्वातंत्र्य मेळ्ळे उपरांत तिच्या हातांत तिरंगो आशिल्लो. हें काम महात्मा गांधींचें आशिल्लें. तांणी लोकांक पिशें केले आनी देशांत हिरो जाले, अशें भिडे हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
