भांगरभूंय | प्रतिनिधी
म्हापशें: वाळकेश्वरवाडो, बेतीं मोटारसायकलीन प्रवासी बसीक मुखा वेल्यान धपको दिल्ल्यान जाल्ल्या अपघातांत आकाश जयप्रकाश कुमार (26, रा. मूळ गोरखपूर, उत्तर प्रदेश) ह्या दुचाकी चालकाक मरण आयलें.
हो अपघात काल (सोमारा) फांतोडेर 1.15 वरांच्या सुमाराक घडलो. वेरें ते मालीमचे दिशेन मयत आकाश कुमार हो जीए 03 एके 4686 क्रमांकाचे सुपर स्प्लेंडर मोटारसायकली वेल्यान येतालो. घडणूक थळार वाळकेश्वरवाडो बेती हांगा रेहमान सलुना कुशीक गातीन आशिल्ले दुचाकीचो धपको मुखा वेल्यान येवपी जीए 03 व्ही 0186 क्रमांकाचे प्रवासी बसीक बसलो.
ह्या अपघातांत मयत तरणाट्याचो एक पांय मोडलो. तशेंच ताच्या पोटाक गंभीर जखम जाली. जखमी अवस्थेंत ताका बांबोळे गोंय वैजकी हॉस्पिटलांत दाखल केलो तेन्ना दोतोरांनी ताक मरण आयिल्ल्याचें जाहीर केलें.
घडणुकेची म्हायती मेळटकच पर्वरी पुलीस उपनिरिक्षक अरूण शिरोडकार हांणी वांगड्या सयत घडणूक थळार धांव घेवन पंचनामो केलो. गोमॅकाँत मरणा उपरांतची तपासणी केले उपरांत कूड कुटुंबाचे सुवादीन केली. फुडलो तपास पर्वरी पुलीस करतात.
मजगतीं, मयत आकाश कुमार हो वेवसायान मेस्त आसून गोंयांत रावपी आपले भयणी कडेन तो दोन दिसां पयलीं आयिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
