भांगरभूंय | प्रतिनिधी
तेल विपणन कंपन्याची आंकडेवारी
पणजीः गोंयांत इंधनाच्या खपांत बरीच वाड जाल्या. फाटल्या वर्साचे तुळेंत अंदूं १ ते २४ मे मजगतीं पेत्रोलाचे विक्रींत ७.६२ टक्के आनी डिजेलाचे विक्रींत १०.०७ टक्के वाड जाल्या. हे फाटभूंयेर सरकारी तेल विपणन कंपन्यांनी गिरायकांक आस्वासन दिलां की इंधनाचो कसलोच उणान ना आनी पुराय देशांत पुरवण सुरळीत चालू आसात.
तेल विपण कंपनींचें राज्यस्तरीय समन्वयक मधुरेंद्र पांण्डेय हांणी सांगलें, इंडियन ऑयल, भारत पेट्रोलियम आनी हिंदूस्तान पेट्रोलियम गिरायकां खातीर पेत्रोल, डिझेल आनी एलपीजी ची अखंड उपलब्धताय सुनिश्चीत करपा खातीर समन्वीत कामकाज आनी लॉजिस्टिक्स साबाळटात.
पाण्डेय हांणी जारी केल्ले आंकडेवारी प्रमाण, गोयांत फाटल्या वर्सा ह्याच काळाचे तुळेंत अंदू १ मे ते २४ मे या काळांत इंधनाचे विक्रेंत लक्षणीय वाड जाल्या. राज्यांत पेत्रोलाचे किरकोळ विक्रींत ७.६२ टक्के वाड जाल्या, जाल्यार डिजेलाचे किरकोळ विक्रींत १०.०७ टक्के वाड नोंद जाल्या.
पांडे हांणी सांगलें, उद्देग क्षेत्रा कडे तशेंच पुराय देशांत पेत्रोल, डिझेल आनी एलपीजीचो फावो इतलो सांठो आसा आनी पुरवण सांखळी सुरळीत दवरपा खातीर आनी इंधन वाटपांत कसलोच अडथळो येवचो न्हय म्हणून सगळे गरजेचे उपाय येवजण्यो केल्यात.
तशेंच, नागरिकांनी पयलीं सारकेंच गरजे प्रमाण इंधन विकत घेवचें आनी भियेवन हिस्पा भायर चड विकत घेवचें न्हय. गरज नासतना सांठवणूक केल्यार पुरवण वेवस्थेचेर ताण येवपाक शकता. पुरवण वेवस्था थीर आसा आनी सध्याचे मागणेची गरज भागोवपाक सक्षम आसा, अशें पाण्डे हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
