अंदूं इफ्फीत जातली विक्रमी प्रतिनिधींची नोंदणी

भांगरभूंय | प्रतिनिधी

केंद्रीय मंत्री मुरुगन हांणी घेतली मुख्यमंत्र्यांची भेट

पणजी : अंदूं राज्यांत जावपी 54व्या चित्रपट महोत्सवांत विक्रमी म्हणल्यार 25 हजार प्रतिनिधींची नोंदणी जातली, अशी आस्त केंद्रीय म्हायती आनी प्रसारण राज्यमंत्री एल मुरुगन हांणी उक्तायली. चित्रपट महोत्सवाचे फाटभुंयेर केंद्रीय राज्यमंत्री एल. मुरुगन हांणी मुख्यमंत्री डॉ. प्रमोद सावंत हांची भेट घेतली. महोत्सवाच्या तयारेचो तांणी नियाळ घेतलो.

महोत्सवा खातीर आतां मेरेन 4 हजार प्रतिनिधींची नोंदणी जाल्या. प्रतिनिधींची नोंदणी नेटान सुरू आसा. अंदूं 25 हजार प्रतिनिधींची नोंदणी जातली. महोत्सवाची तयारी योग्य दिकेन सुरू आसा, अशें केंद्रीय मंत्री एल. मुरुगन हांणी सांगलें.

गोंयांत 20 नोव्हेंबर ते 28 नोव्हेंबर ह्या काळांत चित्रपट महोत्सव जातलो. 2004 सावन दर वर्सा राज्यांत चित्रपट महोत्सव जायत आसा. दर वर्सा महोत्सवाचे लोकप्रियतेंत वाड जायत आसा. चित्रपट उद्देगान हो महोत्सव आपलो मानपाची गरज आसा. हो महोत्सव सरकारान आयोजीत केला, अशें चित्रपट उद्देगाक दिसपाक फावाे ना.

हॉलिवूड अभिनेतो मायकल डग्लस हांचो इफ्फीक सत्यजीत रे जिणेगौरव इनामान भोवमान जातलो. मायकल डग्लस हांकां सरकारान राज्याचे ​अतिथी म्हूण मान दिवचो, अशी विनवणी मुख्यमंत्र्यांक केल्या, अशें केंद्रीय मंत्री मुरुगन हांणी सांगलें.

इफ्फी आयोजन समितीची बसका जाली. हे बसकेक केंद्रीय मंत्री मुरुगन हाजीर आशिल्ले. कला अकादमी, आयनॉक्स थिएटर, मेरियॉट रिसॉर्ट ह्या थळांक मंत्र्यांनी भेट दिली.

फाल्यांच्या सर्जनशील 75 प्रतिभावंंत

उपक्रमांत 19 राज्यांचे कलाकार

चित्रपट महोत्सवात अंदूं तिसरे खेपे फाल्यांचे 75 प्रतिभावंत उपक्रमांत 19 राज्यांचे कलाकार वांटेकार जातले. आंध्र प्रदेश, बिहार, आसाम, दिल्ली, गोंय, गुजरात, हरयाणा, जम्मु कश्मीर, झारखंड, केरळ, मध्य प्रदेश, महाराष्ट्र, मणिपूर, ओडिशा, पंजाब, राजस्थान, तमिळनाडू, उत्तर प्रदेश आनी अस्तंत बंगाल ह्या राज्यांतल्या कलाकारांचो आस्पाव आसा. दिग्दर्शन, पटकथा लेखन, सिनेमाटोग्राफी, अभिनय, संगीतकार, कला रचणूक ह्या वाठारांतल्या कलाकारांचो हातूंत आस्पाव आसा.

श्रेया घोशल, श्रीकर प्रसाद, मनोज जोशी, वीरा कपूर, प्रिया सेट, सरस्वती वाणी बालगम, सलील कुलकर्णी, उमेश शुक्ला, साबू सिरिल, असीम अरोरा हांचो आस्पाव म्हापरिक्षकांत आसा.