भांगरभूंय | प्रतिनिधी
विरोधी पक्ष फुडारी युरी आलेमाव हांची मागणी
पणजी, प्रतिनिधी : राजकारण्यांच्या आशीर्वादाक लागूनच राज्यांत दोंगर कांपणेक नेट आयला. राज्यांतल्यो जमनी बिगर गोंयकार उद्देजकांचे भकीक पडटात. मुख्यमंत्री डॉ. प्रमोद सावंत हांणी पयलीं भश्टाचारी राजकारण्यांचेर कारवाय करची. सामक्या सकयल्या दर्जाचीं कामां केल्ल्या कंत्राटदारांक काळे वळेरेंत घालचें, अश्यो मागण्यो विरोधी पक्ष फुडारी युरी आलेमाव हांणी केल्यो.
पणजेच्या राज्य पांवड्यावेले स्वातंत्र्य दिसाचे कार्यावळी वेळार ते पत्रकारां कडेन उलयताले. राज्य सरकाराची स्वयंपूर्ण गोंय मोहीम अपेशी थारता. राजकारण्यांच्या आशीर्वादान विवीध राज्यांतले उद्देजक गोंयच्यो जमनी हडप करतात. ताका लागून दोंगर कांपपाच्या घडणुकांनी वाड जायत आसा. जमनींचेे झोन बदलतात. भ्रश्ट राजकारण्यांचेर कारवाय करून मुख्यमंत्र्यांनी जर बेगोबेग असले प्रकार आडावंक ना जाल्यार गोंयची अवस्था आनीक वायट जातली, असो भंय तांणी उक्तायलो.
शिक्षण मळावेले उदरगती विशीं मुख्यमंत्री परत परत सांगता. मागीर राष्ट्रीय पांवड्यार गोंय विद्यापीठ दर वर्सां फाटीं कित्याक उरता, असो प्रस्न तांणी उक्तायलो. कॅसिनो ही गोंयची संस्कृती न्हय. तरीय राज्यांत कॅसिनो सुरू आसात. गोंय हे ड्रग्ज, खून, टावट्सांचें केंद्र जायत चल्लां. मुख्यमंत्री नशा मुक्त गोंयचें सपन पळयतात. मात आयज राज्यांतलीं पुलीस स्टेशनांच नशेचीं केंद्रां जाल्यांत, अशीय टिका आलेमाव हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
