भांगरभूंय | प्रतिनिधी
सुदिन ढवळीकार ः दिवचले लोकांच्यो समस्या घेतल्यो जाणून
लोडशेडींग नाशिल्लें गोंय हें एकमेव राज्य आसा. गोंयांत सगल्यां परस सवाय वीज दितात अशें वीज मंत्री सुदिन ढवळीकार हांणी सांगलें.
दिवचलच्या जिमखाना सभाघरांत मयें आनी दिवचल मतदारसंघांतले वीज समस्येचो नियाळ घेवपा खातीर वरिश्ठ अधिकारी, पंच, सरपंच आनी नगरसेवक हांचे जाल्ले जोड बसकेंत ते उलयताले.
दिल्लींत मुफत वीज दिवपाची भास करपी सरकाराच्या पक्षान पंजाबांत लोडशेडींग जाहीर केलां. हे लोक आमकां तत्वज्ञान सांगताले अशी टिका सुदिन ढवळीकार हांणी केली आनी लोकांच्यो समस्या जाणून घेतले उपरांत ताचेर ताकतिकेन उपाय काडपाचे आदेश दिले. उकत्या बाजारांतल्यान 120 मॅगावॅट वीज खरेदी करतले अशें तांणी सांगलें.
ह्या वेळार दिवचलचे आमदार डाॅ. चंद्रकांत शेटये, मयेंचे आमदार प्रेमेंद्र शेट, नगराध्यक्ष कुंदन फळारी, प्रदीप रिवोडकार, मुख्य अभियंते स्टीफन फर्नाडीस, विजय सामंत तशेंच हेर अधिकारी हाजीर आसले. राज्यांतल्या सगल्या म्हालांत वीज उपकरणां, विजेचे खांबे, वीज ट्रान्सफाॅर्मर्स आनी हेर उपकरणां बेगोबेग दितले. विजेचीं कामां गतीमान करतले आनी जमनी पोंदच्यान विजेचे केबल घालतले. दिवचल म्हालांत भुयारी वीज केबल घालपाचें मंजूर जालां. अस्नोडे, दिवचल आदी वाठारांनी सुमार 29 कोटींच्या भुंयारी वीज केबल घालपाक मंजुरी दिल्या अशें ढवळीकार हांणी सांगलें.
पावसांत लायटीच्यो खूब कटकटी उप्रासतात. ते खातीर विशेश यंत्रणा सज्ज दवरतले. चवथ, दिवाळी आदी परबां खातीर ज्यादा उपकरणां उपलब्ध करतले. निकामी खांबे काडटले आनी सगल्यो समस्या पयस करतले अशें उतर ढवळीकार हांणी दिलें.
दिवचलचे बसकेंत नगराध्यक्ष कुंदन फळारी, निलेश टोपले, रंजना वायंगणकार, विजय नाटेकार. मनोज साळगांवकार, कमलाकांत वाडयेकार, बबनराव राणे, दिलीप धारगळकार आदींनी समस्या मांडल्यो. आमदार डाॅ. चंद्रकांत शेटये हांणी विजेचे प्रस्न बेगोबेग सुटावे जावचे हे खातीर वीज मंत्री सुदिन ढवळीकार हांणी मनार घेतलां, सहकार्य दिला अशें सांगून 29 कोटी खर्चून दिवचल वाठारांत भुंयारी केबल घालतले म्हणपाचें सांगलें.
प्रेमेंद्र शेट हांणी मयें मतदारसंघांतल्या कामाची आनी समस्यांची माहिती मंत्र्यांक दिली.
वीज उपकेंद्राक भेट
मजगतीं, वीज मंत्री सुदिन ढवळीकार हांणी आमदार डाॅ. चंद्रकांत शेटये हांचे सयत साळांतल्या वीज उपकेंद्राक भेट दिली. चडशें काम पूर्ण जालां. हे सुवातेर फावो ते कर्मचारी नेमून हें केंद्र सुरू करतले तशेंच हे सुवातेर केंद्राची वीज पुरवण सुरळीत करतले अशें मंत्री ढवळीकार हांणी सांगलें. ह्या वेळार वीज मंत्र्यांनी साळ आनी हेर वाठारांतल्या लोकांच्यो समस्या जाणून घेतल्यो आनी सगल्यो त्रुटी जाता तितले बेगीन पयस करपाचें उतर दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
