भांगरभूंय | प्रतिनिधी
-पुलीस खात्या वरवीं प्रकरणाची चवकशी सुरू
पणजी : गोंय विद्यापिठांतल्या दोन विद्यार्थीनींचेर लिंगीक अत्याचार केल्ले प्रकरणांतल्या वरिश्ठ पुलीस अधिकाऱ्याची पुलीस खात्यान चवकशी सुरू केले उपरांत, संबंदींत अधिकारी रजेर गेला. जाल्यार दुसऱ्या प्रकरणांतल्या प्राध्यापकाक लेगीत रजेर धाडला.
विद्यार्थीनींचेर पुलीस अधिकाऱ्यान लिंगीक अत्याचार केल्ल्याचें प्रकरण उक्ताडार आयले उपरांत जागे जाल्ल्या विद्यापीठ प्रशासनान ह्या प्रकरणाची चवकशी करपी अंतर्गत समितीक बेगोबेग अहवाल दिवपाचे आदेश जारी केले.
तशेंच बायलां आयोगानूय हे प्रकरण गांभीर्यान घेवन समिती कडल्यान अहवाल मागयला. ताका लागून फाटल्या साडेतीन म्हयन्यां पसून एकदाय सुनावणे खातीर हाजीर रावंक नाशिल्लो संबंदींत अधिकारी अंतर्गत समिती मुखार हजर रावलो. फक्त चार दिसांत समितीन अहवाल सादर केले उपरांत विद्यापिठान हो अहवाल बेगोबेग पुलीस खात्याक सादर केलो. पुलीस खात्यान ह्या प्रकरणाची चवकशी सुरू केले उपरांत शुक्रारच्यान संबंदींत अधिकारी रजेर गेल्ल्याची म्हायती पुलीस खात्यांतल्या सुत्रांनी दिली.
मजगतीं, कांय दिसां पयलीं एका विद्यार्थीनीचेर लिंगीक अत्याचार केल्ल्या प्राध्यापकाची बायलां पुलिसांनी चवकशी केले उपरांत ताकाय रजेर धाडला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
