भांगरभूंय | प्रतिनिधी
रॉयल चॅलेंजर्स बंगळुरून क्वॉलिफायर दोनांत सुवात मेळयली. कोलकाताच्या इडन गार्डन्सांत जाल्ले एलिमिनेटरांत ताणें जबरदस्त फॉर्मांत आशिल्ल्या लखनौ सुपर जायण्ट्साक 14 धांवड्यांनी हारयलो. बंगळुरून जैता खातीर दवरिल्ल्या 208 धांवड्यांचो फाटलाव करपी लखनौन 20 ओव्हरींनी 6 विकेटी वगडावन 193 धांवड्यो केल्यो.
लखनौचो मुखेली लोकेश राहुलान 79 धांवड्यांची खेळी केली. पूण, ताका आपल्या पंगडाक जैत मेळोवन दिवपाक जमलें ना.
बंगळुरू आतां 28 मेक दुसरे क्वॉलिफायरांत राजस्थाना रॉयल्सा आड खेळटलो.
ते आदीं रॉयल चॅलेंजर्स बंगळुरूचे स्टार बॅट्समन अपेशी थारल्या उपरांत रजत पटीदारान फक्त 54 बॉलांनी 12 चवके आनी 7 सक्यांचे मजतीन नाबाद 112 धांवड्यांची खेळी करून बंगळुरूक दोनश्यांच्या वयर धांवड्यो करून दिल्यो. ताका दिनेश कार्तिकाची बरी साथ मेळ्ळी. दोगांयनी 41 बॉलांनी नाबाद 92 धांवड्यांची भागिदारी केली. कार्तिकान 23 बॉलांनी नाबाद 37 धांवड्यो केल्यो.
पयलेच ओव्हरींत मुखेली फाफ ड्युप्लेसीसाक बाद केल्या उपरांत लखनौ सुपर जायण्टसाच्या बॉलरांक आपलो शेक दवरपाक जाय आशिल्लो. तातूंत विराट कोहली (25) आनी ग्लॅन मॅक्सवॅल (9) ह्या स्टार बॅट्समनांक लेगीत रोखडेच तंबूंत धाडले. पूण, रजतान लखनौच्या बॉलरांच्या आत्मविस्वासाचो चुरो केलो. मैदानांत देंवल्या पसून ताणें आक्रमक बॅटींग करून लखनौक बॅकफुटाचेर धुकल्लो. तशेंच ताका साबार खेपे जीवनदान मेळ्ळें. लखनौच्या फिल्डरांनी सामकी बाबत फिल्डींग केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
