भांगरभूंय | प्रतिनिधी
भांगरभूंय । प्रतिनिधी
पणजीः भाजपा फुडारी आनी अभिनेत्री सोनाली फोगड हिच्या मरणा कडेन घुंवळी वखदांचो संबंद आयले उपरांत गोंयांतल्यो घुंवळे वखदांचो विशय परत चर्चेक आयला. ताचे फांटभुंयेर फाटल्या आठ म्हयन्यांत राज्यांतल्या घुंवळी वखदां स्मगलिंगांत व्हडा प्रमाणात वाड जाल्या आनी जप्त केल्ल्या घुंवळी वखदांचें मोल दुपेटीन वाडलां हें सामकार आयलां.
अंदू जानेवारी तें आगस्ट मजगतीं पोरूंचे तुळेंत 48.52 टक्के वाड जाल्ली आंकडेवारी दिश्टी पडटा. पुलिसांचें घुंवळी वखदा विरोधी पंगड, गुन्यांव फांटो आनी हेर पुलिसांनी तसेंच कोंकण रेल्वे पुलिसांनी फाटल्या आठ म्हयन्यांत घुंवळी वखदां कडेन संबंदीत 74 गुन्याव नोंद करून 3 कोटी 8 लाख 81 हजार रुपये मोलाचें 108.191 किलोग्राम घुंवळी वखदां जप्त केलीं. पोरूं ह्याच आठ म्हयन्यांत 79 गुन्यांव नोंद करून 1.53 कोटी रुपये मोलांची घुंवळी वखदा जप्त केल्ली.
जानेवारी तें ऑगस्ट मजगतीं घुंवळी वखदां वेव्हारांत आशिल्ल्या 82 जाणांक पुलिसांनी अटक केली. तातूंतले 45 जाण गोंयां भायले, 18 जाण विदेशी आनी 19 जाण गोंयकार आसात. विदेशी नागरिकां मदीं 10 जाण नायजेरीयन, 2 रशियन आनी युगांडा, बेलारूस, नेपाळ, नेदरलँड, लिबेरिया आनी जपानाच्या दरेकी एका नागरिकाचो आसपाव आसा.
जप्त केल्ल्या घुंवळी वखदांत सगल्यांत चड गांजो, ते उपरांत चरश, हशीश तेल, एमडीएमए, कोकेन, एलएसडी, अॅक्टेसी गुळयो, मेथापेटामायन आनी हेरॉईनाचो आसपाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
