भांगरभूंय | प्रतिनिधी
-वाळपय, सांगें, केप्यां पावसान हुपली शंबरी
पणजी : गोंयांत बुधवारा घोग्यांनी पावस पडलो. अरबी दर्यांत तयार जाल्ल्या चक्रीवादळाच्या प्रभावाक लागून फुडले पांच दीस उटंगाराच्या पावसाचो अदमास उक्तावन राज्य हवामान खात्यान काल ‘रेड अलर्ट’ जारी केल्लो. जाल्यार फुडलें दोन दीस ऑरेंज अलर्ट जारी केला. सध्या घोग्यांनी पडपी पावसाक लागून सांगें, केपें आनी वाळपय ह्या वाठारांत पावसान इंचाची शंबरी हुपल्या. जाल्यार राज्यांतलो आतां मेरेनचो वट्ट पावस 93 इंचा वयर नोंद जाला. हवामान विभागान ‘रेड अलर्ट’ जारी केल्ल्यान राज्यांतली आपत्कालीन यंत्रणा सज्ज जाल्या.
अरबी दर्यांत चक्रीवादळ तयार जाल्ल्यान गोंया सयत दर्यादेगा वयल्या सगल्याच राज्यांत उटंगाराचो पावस पडटा. हवामान विभागान हे विशीं पयलीच अदमास उक्तायिल्लो. ते प्रमाण बुधवारा सकाळच्यान उटंगाराच्या पावसाक सुरवात जाल्ल्यान राज्य हवामान खात्यान रेड अलर्ट जारी करून नागरिकांक सादुरतायेची शिटकावणी दिल्या. घोग्यांनी पडपी पावस आनी राज्यांतलीं धरणां ‘ओव्हर फ्लो’ जावपाक लागिल्ल्यान न्हंयांक हुंवार आयलां. न्हंयांच्या आशिकुशीच्या वाठारांनी उदक भरलां. थळाव्या प्रशासनान बेगोबेग आपत्कालीन यंत्रणेक सादूर केल्या.
हवामान विभागान आयज आनी फाल्यां ऑरेंज अलर्ट कायम दवरला. पूण अरबी दर्यांतले चक्रीवादळ खर जाल्यार राज्यांत पावसांत वाड जावपाची शक्यताय आसा.
फाटल्या कांय दिसां पसून उटंगार काम आशिल्ल्यान सांगें, केपें आनी वाळपय केंद्रांतूय पावसान इंचाची शंबरी हुपल्या. जाल्यार हेर 6 केंद्रांनी आतां मेरेन 90 इंचा परस चड पावसाची नोंद जाल्या. उटंगाराच्या पावसाक लागून विवीध वाठारांतले भितरले रस्ते उदकापोंदा गेल्यात. फोंड्यां कांय वाठारांनी हुंवाराची परिस्थिती निर्माण जाल्या. ताका लागून लोकजीण विस्कळीत जाल्या.
आतां मेरेन पडिल्लो पावस (इंचांत)
म्हापशें : 93
पेडणें : 94
फोंडें : 95
पणजी : 88
पोरणें गोंय : 88
सांखळी : 91
वाळपय : 103
काणकोण : 89
दाबोळी : 81
मडगांव : 94
मुरगांव : 80
केपें : 102
सांगें : 107
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
