भांगरभूंय | प्रतिनिधी
पणजी : रस्त्या वयल्या फोंडकुलां खातीर सरकारान 100 वयर कंत्राटदारांक नोटिसो जारी केल्या. संबंदीत अभियंत्यांक नोटिसो जारी करपाचे आदेश मुख्यमंत्री डॉ. प्रमोद सावंत हांणी दिल्या. हाचे फुडे रस्त्या वयली फोंडकुला आनी रस्तो पेड्डेर जाल्यार कंत्राटदारां सयत संबंदीत अभियंत्यांक जापसालदार धरतले, अशें मुख्यमंत्री डॉ. प्रमोद सावंत हांणी स्पश्ट केलां.
भौशीक बांदकाम खात्याचे मंत्री ह्या नात्यान मुख्यमंत्री डॉ. प्रमोद सावंत हांणी बुधवारा भौशीक बांदकाम खात्याच्या अभियंत्यांची बसका घेतली. हे बसकेची म्हायती दितना बाबत रस्त्यां खातीर संबंदींत कंत्राटदार आनी अभियंत्यांचेर कारवाय करपाचे संकेत तांणी दिले.
1 ऑक्टोबर सावन रस्त्यां खातीर अॅपाचेर चलपी इंटीग्रेटेड मॅनेजमेंट पद्दत सुरू जातली. खंयचो रस्तो खंयच्या कंत्राटदारान केला, केन्ना केला, रस्त्याचे डिफेक्ट लायबिलीटी कालावधी, कामाचेर देखरेख दवरपी अभियंते हांची वळेरी तयार जातली. हाका लागून रस्त्याचेर फोंडकुलां पडली वा तो बेगीन बाबत जालो जाल्यार कंत्राटदार आनी अभियंत्यांची म्हायती सरकाराक कळटली.
अपघाताचें प्रमाण वाडत आसा. एखादो अपघात फोंडकुलां खातीर जालो जाल्यार त्या अपघाता खातीर कंत्राटदार आनी अभियंत्याक जापसालदार धरतले. रस्त्या वयलीं फोंडकुलां चवथी पयलीं पुरयतले. ज्या कंत्राटदारान रस्ते केल्यात, तांकांच फोंडकुला पुरोवपाची पडटली. ऑक्टोबर उपरांत पेड्यार जाल्ल्या सगळ्या रस्त्यांची दुरुस्ती जातली. हाचे खातीर कंत्राटदारांक वेगळे पयशें सरकार फारीक करचे ना, अशें मुख्यमंत्र्यांनी बसके उपरांत स्पश्ट केलां.
राज्यांत अंदू उटंगाराचो पावस पडला. पावसाक लागून पणजे सयत हेर सगळ्या रस्त्यांचेर फोंडकुलां पडली. रस्त्या वयले डांबर व्हांवन गेले. फोंडकुलां आनी बाबत दर्जाचेर विधानसभेंत लेगीत चर्चा जाली. भौशीक बांदकाम खात्या वरवीं दर वर्सा रस्त्यांचें हॉटमिक्सींग जाता. हातूंतल्या कांय रस्त्यांचेर पयल्याच पावसात फोंडकुला पडटात. कंत्राटदार तशेंच अभियंंत्यांचेर कारवाय करपाची मागणी आमदारांनी केल्ली. आमदारांच्या मागणे उपरांत मुख्यमंत्री डॉ. प्रमोद सावंत हांणी भौशीक बांदकाम खात्याच्या अभियंत्यांची बसका घेतली. कंत्राटदार तशेंच अभियंत्यांचेर कारवाय करपाची शिटकावणी तांणी बसकेत दिली.
बसके उपरांत अभियंत्यां कडल्यान कंत्राटदारांक नोटिसो धाडपाची प्रक्रिया सुरू जाल्या.
————————
स्पश्टीकरणा खातीर 8 दिसांची मुजत
रस्त्याची निविदा केन्ना जारी जाल्ली आनी रस्तो खंय, खंय पेड्यार जाला, ताचो उल्लेख करून भौशीक बांदकाम खात्यान कंत्राटदारां कडेन स्पश्टीकरण मागला. कंत्राटदाराक 8 दिसां भितर स्पश्टीकरण दिवचे पडटलें.
——————
मुख्यमंत्र्यांचो निर्णय योग्य : सुदिन ढवळीकार
फोंडकुलां तशेंच बाबत रस्त्यां खातीर कंत्राटदार आनी अभियंत्यांचेर कारवाय करपाचो निर्णय योग्य आसा. जे कोण पयशे घेवन सारके काम करिनात, तांचेर कारवाय ही जावपाकूच जाय. कंत्राटदारांक नोटिसो जारी करून मुख्यमंत्र्यांनी कंत्राटदार आनी अभियंत्यांक शिटकावणी दिल्या, अशें वीज मंत्री सुदिन ढवळीकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
