भांगरभूंय | प्रतिनिधी
तज्ञ सल्लागारांची नेमणूक; नव्या चारपदरी पुलाचें लोकार्पण
म्हापशें: न्हंयचो तशेंच म्हापशें शाराचो नियोजनबद्ध सर्वांगी विकास करतले. हें शार पयलीं अर्थीक राजधानी म्हूण नामनेक आशिल्लें. आतां परतून ते नदरेन ह्या शाराक परतून वैभव मेळोवन दितले अशी गवाय मुख्यमंत्री डॉ. प्रमोद सावंत हांणी म्हापशेंकारांक दिली.
सोमारा नव्या चारपदरी तार पुलाचें लोकार्पण केले उपरांत आयोजीत केल्ले कार्यावळींत मुख्यमंत्री डॉ. प्रमोद सावंत उलयताले. ह्या वेळार आमदार ज्योशुआ डिसोझा, आमदार अॅड. कार्लुस फेरेरा, आदले आमदार ग्लेन टिकलो, नगराध्यक्ष शुभांगी वायंगणकार, उपनगराध्यक्ष चंद्रशेखर बेनकर, बस्तोडेंचे सरपंच रणजीत उसगांवकार, उपसरपंच सुनिता लोटलीकार, जिल्हो पंचायत वांगडी मनिषा नायक, नगरसेवक प्रकाश भिवशेट आनी पंच राजेश पिरणकार हाजीर आशिल्ले.
म्हापशें शाराचो सर्वांगी विकास करपा खातीर तज्ञ सल्लागारांची नेमणूक केल्या. शाराच्या नियोजन आराखड्याचें काम रोखडेंच ह्या सल्लागारां कडेन दितले. हें शार कोंयड मुक्त जावचें ही आमदारांची इत्सा आसून ती पुराय करतले. तशेंच सुमार 11 किलो मिटर अंतराचेर आशिल्ल्या न्हंयचें सोबितीकरण करतले. पर्यावरणाची राखण करून हें काम हातांत घेतले. हाका लागपी गरजेचे परवाने मेळटकूच ह्या कामाक गती दितले अशी म्हायती मुख्यमंत्री डॉ. सावंत हांणी दिली.
म्हापशें न्हंयेतलो गाळ उसपुपाची गरज आसा. तशेंच लोकांनी न्हंयेंत मातयेचो भराव वा हेर प्लास्टीक कोयर उडोवन ती प्रदुशीत करची न्हय. कारण हाचे दुश्परिणाम उपरांत आमकांच भोगचे पडटले. राज्य सरकार हें पर्यावरणाच्या हिता खातीर कटिबद्ध आसा. हेरांच्या सल्ल्याची आमकां गरज ना. भाजपा सरकार हें पर्यावरणा विशीं संवेदनशील आसून आमी दिल्लीं कामां वेळांत पूर्ण करतात अशेंय डॉ. सावंत हांणी म्हणलें.
आमदार ज्योशुआ डिसोझान म्हणलें की, तार पुलाचें काम हें आमी पांच म्हयन्यांच्या रेकॉर्ड ब्रेक वेळांत पूर्ण करून दाखयलें. ह्या कामा खातीर 10.30 कोटी रुपया खर्च जाला. ह्या पुलाचें काम करतना हांगा आशिल्लें खंयचेच दुकान वा बांदकामाक धक्को दिवंक ना. फुडल्या 25 वर्सांचो विचार करीत ह्या पुलाचें काम केलां. जाका लागून येरादारी कोंयडेचेर नियंत्रण दवरूंक मेळटलें.
मजगतीं, ह्या तार पुलाचें बांदकाम राज्य सरकारान वेळे पयलींच पुराय करून दाखयिल्ल्यान हळदोणेंचे आमदार अॅड. कार्लुस फेरेरा हांणी ह्या वेळार उलयतना सरकारा सयत मुख्यमंत्र्याची तोखणाय केली.
मुख्यमंत्री डॉ. सावंत हांचे हस्तुकीं फीत कापून आनी नांवतकट्याचें अनावरण केलें. सुत्रसंचालन नगरसेव साईनाथ राऊळ हांणी केलें. येवकार सरपंच रणजीत उसगांवकार जाल्यार उपकार नगराध्यक्ष शुभांगी वायंगणकार हांणी मानले. ह्या वेळार पुलाचे सल्लागार माधव कामत, जीएसआयडीसीचे सरवेवस्थापक ज्युड कार्व्हालो तशेंच कंत्राटदार पी. आर्यन इन्फ्राटेक हांचो मुख्यमंत्र्या हस्तुकीं भोवमान केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
