भांगरभूंय | प्रतिनिधी
पणजीः तमिळनाडू, कर्नाटक आनी महाराष्ट्र हांचे मदीं तयार जाल्ल्या टर्फ आनी हेर हवामानांतल्या बदलांक लागून हवामान खात्यान 19 ते 21 एप्रील ह्या काळांत गोंयांत पावस पडपाची शक्यताय उक्तायल्या. ह्या तीन दिसांत वीज पडपा वांगडा गडगड मारुन पावस पडपाची शक्यताय आसा. 19 एप्रीलाक पावसाचो येलो अलर्ट जारी केला. शेनवाराय गोंयांत गरमी चालूच उरली. फुडले स दीस राज्यांत चडांत चड तापमान 33 ते 35 अंश सेल्सियस मदीं उरपाची शक्यताय आसा.
राज्यांतल्या कांय वाठारांनी सकाळीं कांय वेळ ढगाळ वातावरण आशिल्लें. पूण पावस पडूंक ना. शेनवारा पणजे तापमान चडांत चड 33.6 अंश आनी उण्यांत उणें तापमान 25.5 अंश नोंद जालें. मुरगांवां चडांत चड तापमान ३३.२ अंश आनी उण्यांत उणें २६ अंश आशिल्लें. फुडले स दीस राज्यांत उण्यांत उणें तापमान 24 ते 25 अंश सेल्सियस मदीं आसतलें असो अदमास हवामान खात्यान उक्तायला. 21 ते 25 एप्रील ह्या काळांत राज्यांतलें हवामान सुकें उरपाची शक्यताय आसा.1 ते 18 एप्रील ह्या काळांत राज्यांत सरासरी 1.3 मिमी पावसाची नोंद जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
