भांगरभूंय | प्रतिनिधी
– विरोधक सदांच आमच्या निर्णया आड : गृह मंत्री
– महिला आरक्षण विधेयक 2026 पडलें
– बायलांक आरक्षण दितलेच : अमीत शाह
खबरां संस्था
नवी दिल्ली : महिला आरक्षण विधेयक 2026 लोकसभेंत पडलें. हें विधेयक पास करून इतिहास रचपाची संद आशिल्ली. इतिहासीक संद गेली, म्हूण गृहमंत्री अमीत शाह हांणी काँग्रेस आनी हेर विरोधकांक वडीर काडले. गरज पडल्यार बायलांक आरक्षण दिवपा खातीर आमी झगडटले, पूण तांचे हक्क ते निश्चीत करतले अशें तांणी सांगलें.
आमी हाडिल्ल्या सगल्या विधेयकांक आनी कायद्यांक काँग्रेस आनी विरोधी पक्षान सदांच विरोध केला, अशें तांणी सांगलें. विरोधकांनी विरोध केल्ल्या सगल्या विधेयकांची ताणें वळेरीच वाचली. आमी कलम 370 काडून उडयलें, तांणी ताका विरोध केलो. राम देवूळ बांदलें, तांणी ताका विरोध केलो. तिहेरी तलाक रद्द जालो, तांणी ताका विरोध केलो. सर्जिकल स्ट्रायक केलो, ताका विरोध केलो, अशें शाह हांणी म्हणलें.
सभाघरांत चर्चे वेळार मतदानाची प्रक्रिया पुराय जाली. इलॅक्ट्रॉनीक मतदाना वेळार सभाघरांत हाजीर आशिल्ल्या वट्ट 489 खासदारां मदलीं 278 मतां विधेयकाचे वटेन, जाल्यार 211 मतां विधेयकाच्या विरोधांत आशिल्लीं. संख्यांची पुराय गणना नाशिल्ल्यान ह्या विधेयकाचो लोकसभेंत पराभव जालो. पूण निमाण्या मतदानाचे आंकडे इलॅक्ट्रॉनीक मतदाना परस वेगळे आशिल्ले. उपरांत जाहीर केल्ल्या आंकड्यां प्रमाण विधेयकाच्या वटेन 298 मतां मेळ्ळीं, जाल्यार विरोधांत 230 मतां दिसलीं. ते भायर सरकारान ह्या विधेयका वांगडा लोकसभेंत हाडिल्लीं हेर दोन विधेयकां फाटीं घेतलीं.
विधेयक मंजूर जावचे खातीर दोन-तृतियांश भोवमताची गरज आशिल्ली. 528 चीं दोन- तृतियांश म्हणल्यार 352 मतां. हाचो परिणाम 54 मतांच्या फरकान हें विधेयक मंजूर जावपाक शकलें ना.
ताचे आदीं ह्या विधेयकाचेर उलयतना गृह मंत्री अमीत शाह हांणी सांगलें, प्रधानमंत्री नरेंद्र मोदी जें कितें करता, ताचे फायदे- लुकसाण पळय नासतना ताका विरोध करपाचें विरोधी पक्षान थारायलां. देशांतल्या आवय- भयणां खातीर आरक्षण येता, ताका लागून कसलोच विरोध जावचो ना, अशें दिशिल्लें, पूण विरोध जाता. आपूण आतां सांगलां, हें विधेयक 2023 त एकमतान मंजूर जाल्लें, पूण आयज काँग्रेस फाटीं सरता. हाचीं फकत दोनूच कारणां आसात- एक म्हणल्यार मोदी हें विधेयक हाडटा आनी ताचें स्रय तांकां मेळटलें. मोदी हांणी तांकां एक जायरात दिवन ताचें स्रय तांकां दिता अशें सांगलें, पूण ते आयकुपाक तयार नात.
बायलांक सक्षम करचे खातीर आनी तांकां तांचो वांटो दिवचे खातीर आमकां कोणाकूय फुडो करचो पडल्यार जाता, आमकां कसलोच फरक पडना. आमी ते करतले, आमी लडटले आनी आमी आरक्षण दितलेच. आपल्याक एका पत्रकाराचो फोन आयिल्लो. ताणें सांगलें, विरोध करपाचें कसलेंच कारण ना. आपणे सांगलें, पळय, फकत महिला आरक्षण विरोधकाकूच विरोध जायना. आमी तिट्टी तलाक हाडलो, ताका विरोध केलो. आमी राम मंदीर बांदले, ताका विरोध केलो. जेन्ना आमी नवी संसद इमारत बांदली तेन्नाय विरोध केलो. आमी नक्षलवाद काबार केलो, आमी आतंकवाद आळाबंदा हाडलो, विरोधकांनी दरेके गजालीक विरोध केलो, अशें शाह हांणी सांगलें.
जातीनिहाय जनगणनेचो अहवाल सभाघरा मुखार सादर करतले. सभाघरांत ताचेर चर्चा जातली आनी तातूंतल्यान जें सामुहीक एक मत मुखार येतलें, ताचे प्रमाण भाजप फुडलीं पावलां उखलतलो. तांचे खातीर वेंचणुको जिखप हेंच सगल्यांत व्हडलें आसा, आमचे खातीर मात राष्ट्र सगल्यांत व्हड, लोक सगल्यांत व्हड आसात. आपूण काँग्रेसींतल्या आपल्या इश्टांक सांगपाक सोदतां, फकत घोशणाबाजी केली म्हूण तुमी तांचे बरे मागपी आसात, हाचेर देशांतल्या मागासवर्गीय लोकांचो विस्वास बसचो ना. ह्या देशांतले लोक फटकिरो मोग वळखतात आनी काँग्रेसीनूच तांचे अधिकार काडून घेतिल्ले, हाची आयज सावन ह्या देशांतल्या बायलांक लेगीत जाणीव जातली, अशें शाह हांणी सांगलें.
ह्या विधेयका वांगडा आनीक दोन विधेयकां मांडपाचीं आशिल्लीं, पूण तीं मांडलींच ना. पयलें मतदारसंघ पुनर्रचना घटना दुरुस्ती विधेयक, 2026 आनी दुसरें केंद्रशासीत प्रदेश कायदे (दुरुस्ती) विधेयक, 2026. ह्या विधेयकांचेर स्वतंत्र मतदान घेवपाक सरकारान न्हयकार दिलो. हीं विधेयकां मुख्य विधेयका कडेन संलग्न आशिल्ल्यान, तांचेर स्वतंत्र मतदानाची गरज ना, अशें कारण सरकारान दिलें.
मतदाना आदीं शाह हांणी एका वराचें भाशण दिलें. ह्या विधेयकांक मंजुरी मेळ्ळी ना जाल्यार ताचे खातीर विरोधी पक्षूच जापसालदार आसतले, असो दावो तांणी केलो. देशांतलीं बायलां पळयतात, तांचे उदरगतीच्या मार्गार कोण आडखळ निर्माण करपाचें काम करता, अशेंय तांणी म्हणलें.
विधेयकाचेर जाल्ल्या मतदाना उपरांत विरोधी पक्ष फुडारी राहूल गांधी हांणी म्हणलें, संविधानाचेर जावपी हल्लो आमी निर्फळ केलो. आमी स्पश्ट सांगिल्लें, हें विधेयक म्हणल्यार महिला आरक्षणाचें खरें विधेयक न्हय, जाल्यार भारताची राजकी रचना बदलपाचें एक कुटील कारस्थान आसा. प्रियंका गांधी हांणी सांगलें, हें आमचे लोकशायेचें आनी आमच्या देशाचे एकतेचें एक व्हड जैत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
